Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 356 Hüküm no: 522 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İsmail’in Şatır Mustafa’dan aldığı borca karşılık evini rehin verdiği Kasaba-i Rodoscuk mahallâtından Yunus Bey Mahallesi’nde sâkin Fâtıma bt. İsmail nâm hatun mahfil-i kazâda Şatır Mustafa nâm kimesne tarafından ikrâr-ı âti’l-beyânı tasdîka vekîl-i sâbitü’l-vekâlesi olan yeniçeri mumcularından işbu bâ‘isü’l-kitâb Mehmed Bey b. İbrahim mahzarında ikrâr-ı tâm ve takrîr-i kelâm edip müvekkil-i mezbûr Şatır Mustafa’ya cihet-i şer‘iyyeden altmış kıt‘a riyâlî guruş zimmetimde lâzımü’l-edâ deynim olup mukābelesinde mahalle-i mezbûrede vâki‘ bir tarafı Bağışlandı mülkü ve bir tarafı Şah Balioğlu Ahmed Beşe mülkü ve bir tarafı Ahmed Ağa mülkü ve bir tarafı tarîk-i âm ile mahdûd mülk menzilimi târîh-i kitâbdan on gün mukaddem ol mahalde mezbûr Şatır Mustafa’ya rehin vaz‘ edip ol dahi menzil-i mezbûru meblağ-ı merkūm mukābelesinde irtihân ve kabûl ve kabz [ve] tesellüm eylemiş idi dedikde gıbbe’t-tasdîkı’ş-şer‘î mezbûre Fâtıma merkūm Mehmed Bey mahzarında i‘âde-i kelâm ve tebyîn-i merâm edip zikrolunan altmış kıt‘a riyâlî guruş deynimi târîh-i kitâbdan elli gün tamamına değin mezbûr Şatır Mustafa’ya edâ ve îfâ etmezsem menzil-i mezbûru semen-i misli ile bey‘a ve kabz-ı semene ve semeninden zikrolunan altmış guruş deynimi mezbûr Şatır Mustafa’ya edâya bâkī ne kalırsa bana îsâle mezbûr Mehmed Bey’i tarafımdan vekîl ve menâbıma nâib nasb ve ta‘yîn eyledim dedikde mezbûr Mehmed Bey dahi vekâlet-i mezbûreyi kabûl ve merasimini edâya müte‘ahhid olmağın mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’t-tâsi‘ aşer min-Zilhicceti’ş-şerîfe min-şühûr li-sene erba‘a ve sittin ve elf. Şuhûdü’l-hâl: Hasan Çelebi b. Yusuf, Ali Beşe b. Hüseyin, Mehmed Beşe b. Hüseyin, Ruscuklu Muslı, Muhyi b. Abdullah, Fazlullah Beşe çukadâr ve gayruhum mine’l-huzzâr.