Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 88 Hüküm no: 3 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Abdullah’ın kızının evinde vefat eden hanımı Fâtıma bt. Mustafa’nın götürdüğü eşyaları vermesi için kızı Emine’ye açtığı davayı ispat edemediği Eşyâ da‘vâsından men‘ Ma‘rûz Sahib-i arzuhâl Kapıkethudâsı İbrahim Beşe b. Abdullah meclis-i şer‘-i enverde sulbiye kebîre kızı olup zâtı ta‘rîf-i şer‘î ile mu‘arrefe olan Emine Hatun muvâcehesinde mukaddemâ zevce-i menkûham müteveffât Fâtıma bt. Mustafa hayatında malımdan ve menzilimden bi-gayr-ı hakkın ahz edip kızı işbu mezbûre Emine Hatun’un menziline götürdüğü iki top keten bezi ve bir nühâsî mangal ve bir saplı ayak ve bir kahve tepsisi ve iki kahve ibriği ve yün ile memlû bir döşek ve yine yün ile memlû iki minder ve dört sahan ve sekiz yemenî yasdık yüzümü bana kable’r-red ve’t-teslîm zevcem mezbûre kızı işbu mezbûre Emine’nin yanında vefât edip eşyâ-i mezkûrem kızım mezbûre Emine’nin yedinde ve zimmetinde kalmağla taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsını beyândan ızhâr-ı acz birle lede’l-istihlâf ve’t-tahlîfi’ş-şer‘î mûcebince müdde‘î-i mezbûr bilâ-beyyine eşyâ-i mezkûre da‘vâsıyla mezbûre Emine Hatun’a bî-vech mu‘ârazadan men‘ olunduğu mahkeme-i bâbdan huzûr-ı âlîlerine i‘lâm olundu. Fî 27 min-Saferü’l-hayr sene 1162