Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 89 Hüküm no: 4 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski ayakkabıcı esnafından Küçük Mehmed Beşe’nin kiraladığı dükkânı haksız yere zapteden Kirkor’un dükkânı boşaltması Bâ-mühr-i hazret-i efendi Ma‘rûz Sahib-i arzuhâl eski ve müsta‘mel ayakkabı cem‘ eden esnâfdan Küçük Mehmed Beşe meclis-i şer‘de Kirkor nâm zimmî muvâcehesinde esnâfları kethudâsı ve zikri âtî eskici dükkânının mutasarrıfları es-Seyyid el-Hâc Ali Efendi ve el-Hâc Hüseyin Ağa’nın vekîl-i şer‘îleri hazır oldukları hâlde Bitpazarı kurbünde Parmakkapı’da vâki‘ bir bâb eskici dükkâ[n] müste’ciri olan Sürheb nâm zimmî hâlik olmağla mutasarrıfları olan mezbûrân işbu yedimde olan memhûr temessükleri mûcebince kethudâmız ma‘rifetiyle işbu Saferü’l-hayr gurresinden beher mâh ikişer guruşa müşâhereten bana îcâr ve ben dahi ber-minvâl-i muharrer istîcâr etmiş iken işbu mersûm Kirkor dükkân-ı mezkûra bi-gayr-ı hakkın vaz‘-ı yed eder kasr-ı yediyle bana teslîmine tenbîh olunmak matlûbumdur deyü ba‘de’d-da‘vâ ve’s-suâl mersûm Kirkor dükkân-ı mezkûra vaz‘-ı yedini ve müste’ciri hâlik-i mesfûr Sürheb zimmî hâlik olmağla dükkân-ı mezkûru mutasarrıfları olan mezbûrân gurre-i Safer’den müdde‘î-i merkūma müşâhereten îcâr eylediklerini ikrâr lâkin ben hâlik-i mesfûrun dükkân-ı mezkûrda mevcûd terekesini vârisinden ve emîn-i beytü’l-mâldan bâ-hüccet yüz guruşa iştirâ ettiğime binâen dükkân-ı mezkûru dahi istîcâr etmiş olurum dükkân-ı mezkûrun mutasarrıfları âhara îcârdan memnû‘lardır dediği gayr-ı meşrû‘ olmağla lağv-ı mahz olduğundan dükkân-ı mezkûru tahliye ve müste’ciri merkūm Küçük Mehmed Beşe’ye teslîme mersûm Kirkor zimmîye şer‘an tenbîh olunduğu huzûr-ı âlîlerine i‘lâm olundu. Fî 27 Safer sene 1162