Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 90 Hüküm no: 5 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Seyyid Hacı Osman b. Ali ile Seyyid Mustafa b. Seyyid İsmail’in birbirlerine açtıkları hakaret davasından vazgeçtikleri; keresteci esnafının talebiyle de Osman’ın keresteci esnaflığından çıkarıldığı Bâ-mühr-i hazret-i efendi Ma‘rûz Keresteci esnâfından sahib-i arzuhâl es-Seyyid el-Hâc Osman b. Ali yine esnâf-ı mezkûreden es-Seyyid Mustafa b. es-Seyyid İsmail herbiri meclis-i şer‘de âhar mahzarında târih-i i‘lâmdan dokuz gün mukaddem Keresteciler sûkunda şütûm-ı galîza ile bana şetm etmekle üzerinde olan hakk-ı ta‘zîrimi taleb ederim deyü herbirimizin âhardan eylediğimiz da‘vâmız[dan] herbirimiz fâriğ olup husûs-ı mezkûra müte‘allik herbirimizin âhar ile kat‘a da‘vâ ve nizâ‘ı yokdur dedikleri ba‘de’t-tescîl esnâf-ı mezkûre kethudâsı Mustafa Çelebi ve yiğitbaşıları es-Seyyid İbrahim ve ihtiyârlarından es-Seyyid el-Hâc İsmail ve Arabzâde el-Hâc Mehmed ve el-Hâc Hasan ve el-Hâc Abdurrahman ve İsmail ve İsmail Bey ve el-Hâc Mustafa ve es-Seyyid Mehmed Çelebi ve el-Hâc Süleyman ve el-Hâc Mehmed ve el-Hâc İbrahim [2a] diğer es-Seyyid Mehmed Çelebi ve diğer el-Hâc Mustafa ve Molla Ahmed nâm kimesneler meclis-i mezkûrda mezbûr es-Seyyid el-Hâc Osman muvâcehesinde mezbûr hadîdü’l-lisân ve dil-âzâr ve sû’-i hulk sahibi olduğundan herbirimiz mezbûrdan müteneffir ve muhâlatasından müctenib olduğumuza binâen mezbûr ba‘de’l-yevm kendi kisbi ile meşgūl olup bizim lonca ta‘bîr olunur cem‘iyetimize gelmeyip umûrumuza kat‘a karışmaması matlûbumuzdur dediklerinde ol dahi ba‘de’l-yevm kendi hâlinde kâr ü kisbi ile meşgūl olup loncalarına varmayıp ve umûrlarına kat‘a karışmamak üzere ta‘ahhüd etmekle ba‘de’t-tescîl bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 27 Safer sene 1162