Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 90 Hüküm no: 6 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekrar kayıkçılık yapmaya başlayan Kara Ali b. Abdullah’ın kayıkçılık yapmaktan menedildiği Ma‘rûz Mahmiye-i İstanbul hısnı ebvâbından Fener Yenikapısı İskelesi’nde vâki‘ piyâde kayıkçıları tâifesinin kethudâları Osman b. Bekir ve ihtiyâr ustalarından es-Seyyid el-Hâc Mehmed b. Mahmud ve Süleyman b. Abdi ve Mehmed Beşe b. Abdullah ve es-Seyyid İsmail b. Hasan ve Abdi b. Ali ve Abdullah b. Mehmed ve Mehmed b. Mustafa ve Mehmed b. Ali ve Mustafa b. Ahmed ve Mehmed Beşe b. Hüseyin ve Mustafa Beşe b. Mehmed ve Mustafa b. İbrahim nâm kimesneler meclis-i şer‘-i enverde mukaddemâ iskele-i mezkûrede kayıkçı olan Kara Ali b. Abdullah muvâcehesinde mezbûr Kara Ali mukaddemâ iskelemizde kayıkçı olup ancak kendi hâlinde olmadığından bâ-i‘lâm-ı şer‘î iskele-i mezkûrede kayıkçılık işlemekden men‘ olunmuşiken hâlâ gelip yine iskele-i mezkûrede kayıkçılık işlemek murâd eder lâkin mezbûrdan iskelemiz kayıkçılarından bir ferdin emniyet ve râhatları olmadığından mâ‘adâ mezbûra iskele-i merkūme ahâlîsinden kefîl olur kimesne dahi olmamağla ke’l-evvel mezbûr Kara Ali iskele-i mezkûrda kayıkçılık işlemekden men‘ olunmasını iltimâs ederiz deyü da‘vâ ve mezbûr Kara Ali cevâbında fi’l-vâki‘ mukaddemâ iskele-i mezkûrede kayıkçılık işlemekden bâ-i‘lâm-ı şer‘î men‘ olunduğunu ikrâr ve fîmâ-ba‘d dahi işlememeğe ta‘ahhüd edip ol vechile kat‘-ı nizâ‘ ettikleri mahkeme-i bâbdan huzûr-ı âlîlerine i‘lâm olundu fermân men-lehu’l-emrindir. Fî 28 Safer sene 1162