Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 91 Hüküm no: 7 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yavuzerzâde Sinan Bey Vakfı’na ait Çorum’da Kuruçay ve Karaağaç köyleri tevliyetinin kendisine ait olduğunu iddia eden Kuzubaş Molla Ömer’in kaydının terkin edilip bu köyler de dahil olmak üzere mütevelliliğin Ömer Halife’ye tevcihi Tevliyet beratı ricâsında i‘lâm Bâ-mühr-i hazret-i efendi Ma‘rûz Derûn-ı arzda mastûre Yavuzerzâde Sinan Bey Vakfı’nın hazîne-mândesi mukābili bâ-berat-ı âlîşân ber-vech-i te’bîd mütevellîsi olan Ömer Halîfe ile yine derûn-ı arzda mastûrü’l-ism Kuzubaş demekle ma‘rûf Molla Ömer meclis-i şer‘de zikri âtî vakıf karyeler için tenâzu‘ ve terâfu‘larında tarafeynin senedlerine ba‘de’n-nazar mezbûr Kuzubaş Molla Ömer’in yedinde olan askerî beratında derkenârda tahrîr olunduğu üzere Çorum kazâsına tâbi‘ Kuruçay nâm karyede Yavuzer binâ eylediği çeşme ta‘mîrine vakıf olan karye-i mezbûre Karaağaç nâm karyenin nısf mâlikânesi çeşme-i mezbûru ta‘mîr şartıyla Ömer mahlûlünden mutasarrıf olan Abdullah fevt olmağla mahlûlünden bin yüz altmış bir senesi Rebî‘ülevvel’inde arzuhâlleri mûcebince mezbûr Kuzubaş Molla Ömer’e ve babası Mehmed’e münâsafaten tevcîh olunmuş müteveffâ Abdullah’ın kaydında Hızır ref‘inden bin seksen târihiyle müverrah berat ile Ömer üzerinde iken fevt olmağla mahlûlünden Abdullah’a tevcîh olunmuş lâkin Abdullah’a tevcîh olunduğu târih beyân olunmamış merkūm Ömer Halîfe’nin beratında kezâlik derkenârda mastûr olduğu üzere câmi‘-i şerîf-i merhûm Yavuzerzâde Sinan Bey der-nezd-i Kapan-ı dakīk der-İstanbul vakfının tevliyeti hazîne-mânde mukābili bin yüz kırk bir târihinde nâzır-ı vakf İstanbul kādısı es-Seyyid Zeynelabidin Efendi arzı ile mezbûr Ömer Halîfe’ye tevcîh olunup yedine berat-ı âlîşân ihsân olunmuş ve defter-i mufassal-ı sultânî mûcebince Kuruçay karyesinin nısf mâlikânesi ve Karaağaç karyesi mâlikânesi Vakf-ı Sinan Bey v. Yavuzer deyü tasrîh olunmuş ve ez-kadîm vakf-ı mezkûrun ma‘rifet-i şer‘le her sene hesâbı rü’yet olundukda mârrü’z-zikr karyelerin mahsûlâtı vakf-ı câmi‘-i mezkûr mütevellîleri taraflarından zabt ve îrâd ve masraf olunduğu muhâsebe defterlerinde ve sicillâtda mukayyed olup el-hâsıl mezbûr Kuzubaş Molla Ömer’in müdde‘âsını mübeyyin yedinde ihticâca sâlih kat‘a sened-i şer‘î olmayıp askerî beratı dahi Yavuzer Vakfı olmak üzere bin seksen sekiz târihiyle müverrah bir atîk berata mübtenî münâza‘un-fîh olan karyeler ise defter-i mufassal-ı sultânîde Vakf-ı Sinan Bey v. Yavuzer deyü tahrîr olunmağın defter-i sultânîye ve amel-i kadîme muhâlif ve vakf-ı mezkûr İstanbul kādıları efendiler nezâretlerinde olmağla tevliyeti tevcîhi inhâlarıyla olagelmeğin mezbûr Kuzubaş Molla Ömer’in yedinde olan askerî beratı gayr-ı mu‘teber olup tevliyet-i mezkûrda kat‘a alâkası olmadığı zâhir olmağla askerî kaydı terkīn ile külliyyen müdâhale ve mu‘ârazası men‘ ve kayıdlarına şerh verilip tevliyet-i mezkûre yedinde olan berat-ı âlîşân mûcebince merkūm Ömer Halîfe’ye tevcîh ve ibkā olunmak bâbında emr-i âlîşân istid‘â eylediği ma‘lûm-ı devletleri buyruldukda emr ü fermân hazret-i veliyyü’l-emrindir. Fî 27 Saferü’l-hayr sene 1162