Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 92 Hüküm no: 8 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe bt. Abdurrahman’ın, kocası İbrahim Ağa b. Salih’in eşyalarının emaneten Silahdar Ocağı’ndan İbrahim Efendi b. Mehmed’de olduğu iddiasıyla açtığı davayı ispat edemediği Ma‘rûz İbrahim Ağa b. Salih’in zevcesi ve tarafından vekîl-i sâbitü’l-vekâlesi olan Şerife Âişe bt. Abdurrahman meclis-i şer‘de Silâhdâr ocağı halîfeleri şâkirdlerinden diğer İbrahim Efendi b. Mehmed muvâcehesinde mukaddemâ zevcim müvekkil-i mezbûr İbrahim Ağa malından bir sîm kılıç ve bir sîm gaddâre ve bir sîm topuz ve bir sîm balta ve bir çuka kesme ve üç sâye çuka binişini hıfz için bi-tarîkı’l-emâne mezbûr İbrahim Efendi’ye def‘ ve teslîm ol dahi yedinden ahz u kabz etmişidi hâlâ eşyâ-i mezkûremi taleb ederim deyü ba‘de’d-da‘vâ ve’s-suâl mezbûr İbrahim Efendi cevâbında eşyâ-i mezkûreyi istid‘â ve ahzını külliyyen inkârından mâ‘adâ işbu vekîl-i zevce-i müdde‘iye-i mezbûre Şerife Âişe târih-i i‘lâmdan altı ay yirmi bir gün mukaddem İstanbul’da Davudpaşa Mahkemesi’nde nâibü’ş-şer‘i’ş-şerîf olan fazîletlü Hudâdâd Mehmed Efendi huzûrunda dahi eşyâ-i mezkûreyi benden yine bi’l-vekâle ba‘de’d-da‘vâ ve’l-inkâr bi’l-vekâle müdde‘âsını beyândan ızhâr-ı acz birle lede’l-istihlâfi’ş-şer‘î işbu vekîl-i zevce-i müdde‘iye-i mezbûre Şerife Âişe Hatun bilâ-beyyine bi’l-vekâle eşyâ-i mezkûre da‘vâsıyla bana mu‘ârazadan men‘ olunmuşidi deyü nâib-i mûmâ-ileyhin hâtemini hâvî ve mazmûnu takrîr-i meşrûhuna mutâbık bir kıt‘a i‘lâm-ı şer‘î ibrâzıyla ba‘de’d-def‘ ve’l-inkâr mezbûr İbrahim Efendi def‘-i mezkûrunu ahrâr-ı ricâl-i Müslimînden lede’t-tezkiye adâletleri zâhir olan el-Hâc Ahmed b. el-Hâc Mehmed ve Hüseyin Çelebi b. Hasan şehâdetleriyle vekîl-i zevce-i müdde‘iye-i mezbûre Şerife Âişe muvâcehesinde vech-i şer‘î üzere isbât etmeğin mûcebiyle vekîl-i zevce-i müdde‘iye-i mezbûre Şerife Âişe bilâ-beyyine da‘vâ-yı mezkûresiyle mezbûr İbrahim Efendi’ye bî-vech mu‘ârazadan men‘ olunduğu bâbdan huzûr-ı âlîlerine i‘lâm olundu. Fî 28 Safer sene 1162