Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 98 Hüküm no: 18 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Salih’in Naib Ali Efendi’de alacağı olduğu iddiasıyla açtığı davada Ali Efendi’nin borcunu ödediğini ispat ettiği Ma‘rûz Sahib-i arzuhâl Mehmed b. Salih meclis-i şer‘-i enverde derûn-ı arzuhâlde mezkûr Ali Efendi b. Mehmed muvâcehesinde mukaddemâ mezbûr Ali Efendi Radoviş kazâsı nâibi oldukda malımdan ve yedimden istikrâz ve ahz ve istihlâk eylediği iki yüz elli guruşu bana edâsında altmışar paraya verdiği fulya guruşu başından eylediğim yirmi beş guruş noksan ile kazâ-i mezbûrda mezbûr Ali Efendi’ye eylediğim üç ay hizmetimin seksen beş guruş ecr-i misl-i hakkım ki cem‘an zimmetinde yüz on guruş hakkım olmağla taleb ederim deyü ba‘de’d-da‘vâ ve’s-suâl mezbûr Ali Efendi cevâbında mârrü’z-zikr Radoviş kazâsında ve bin yüz altmış bir senesi Şa‘bân-ı şerîf’inin beşinci gününde müdde‘î-i mezbûr Mehmed’e zimmetimde olan iki yüz elli guruş deynim ile bana olan üç ay hizmeti mukābelesinde dahi yirmi yedi guruş ücret verip ol dahi yedimden ahz u kabz edip deyn ve hizmet-i mezkûresine müte‘allika da‘vâdan benim zimmetimi ibrâ ve ıskāt eyledi deyü mazmûnu takrîr-i meşrûhuna mutâbık müdde‘î-i mezbûrun imzâ ve hâtemini hâvî bir kıt‘a temessük ibrâzıyla olan def‘ini müdde‘î-i mezbûr Mehmed dahi ikrâr ve i‘tirâf etmeğin mûcebiyle müdde‘î-i mezbûr Mehmed da‘vâ-yı mezkûresiyle mezbûr Ali Efendi’ye bî-vech-i şer‘î mu‘ârazadan men‘ olunduğu bâbdan huzûr-ı âlîlerine i‘lâm olundu. Fî 11 Ra sene 1162