Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 99 Hüküm no: 19 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekçi esnafı kethudalığının yine Hacı Ali b. Hasan’a tevcihi Bâ-mühr-i hazret-i efendi. Kethudâ-yı kazzâz Ma‘rûz İstanbul’da vâki‘ kazzâz esnâfının ustalarından Mustafa Çelebi ve el-Hâc Mehmed ve el-Hâc Abdullah ve es-Seyyid Yahya ve Paşove ve Menahim ve İsak ve Yako ve David ve Mayer ve İlyaz ve Yasef ve Sabatay ve Salamon ve Flak ve Arslan ve Ohan ve Kigork ve Toma ve Dimitri ve Matyos ve Asvador ve Avanis ve Avakim ve Kasber ve Hristo ve sâir Müslim ve zimmî yüz neferden mütecâviz ustalar meclis-i şer‘de bâ-berat-ı âlîşân kethudâları el-Hâc Ali b. Hasan hazır olduğu hâlde mezbûr muhtârımız olduğundan bâ-berat-ı âlîşân kethudâmızdır ve evzâ‘ ve etvârından her vechile hoşnûd ve râzıyız lâkin işbu hâzırân bi’l-meclis esnâfımızdan Mustafa Odabaşı ve el-Hâc Süleyman kethudâlık arzusuyla esnâfımız beynlerinde kīl ü kāle bâdî bazı tahrîke tesâddî eyledikleri mesmû‘umuz olmağla kethudâmız cümlemizin muhtârı ehl-i ırz bir kimesne olduğunu ifâde ile kemâ-kân kethudâlığımız mezbûra ibkā olunmak matlûbumuzdur dediklerinde mezbûrân Mustafa Odabaşı ve el-Hâc Süleyman dahi kethudâlık talebinde olduklarını inkâr ve kethudâmızdan biz dahi hoşnûduz deyüp el-hâsıl mezbûr el-Hâc Ali’nin her vechile hüsn-i hâli zâhir olmağın kethudâlık-ı esnâf-ı mezkûre kemâ-kân mezbûra ibkā buyurulmak bâbında esnâf-ı mezkûre ricâlinin ber-minvâl-i muharrer istid‘â ve istirhâmları ma‘lûm-ı devletleri buyruldukda emr ü fermân hazret-i veliyyü’l-emrindir. Fi’l-yevmi’l-âşir min-şehri Rebî‘ülevvel sene 1162