Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 99 Hüküm no: 20 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekçi esnafının yiğitbaşısı Mustafa Odabaşı ile Usta Hacı Süleyman b. İsmail’in görevlerine son verilip esnaflıktan çıkarıldıkları Yiğitbaşılarlıkdan [yiğitbaşılıkdan] azl Bâ-mühr-i hazret-i efendi. Ma‘rûz Ashâb-ı arzuhâl kazzâz tâifesinin bâ-berat-ı âlîşân kethudâları el-Hâc Ali b. Hasan ve ihtiyâr ustalarından Mustafa Çelebi ve el-Hâc Mehmed ve el-Hâc Abdullah ve es-Seyyid Yahya ve Yahûdî ustalardan Paşove ve Menahim ve İsak ve Yako ve Mayer ve David ve Yako ve İlyaz ve Yasef ve diğer Yako ve Sabatay ve İsak ve Menahim ve Salamon ve David ve diğer Yasef ve Flak ve Arslan ve Ermeni ustalardan Ohan ve Kigork ve Toma ve Dimitri ve Matyos ve Asvador ve Avanis ve İşman ve Kigork ve Avakim ve Ohan ve Kasber ve Hristo ve sâir Müslim ve zimmî cerîdede mazbûtü’l-esâmî yüz neferden mütecâviz ustalar meclis-i şer‘de yiğitbaşıları Mustafa Odabaşı ve ustalarından el-Hâc Süleyman b. İsmail hazır oldukları hâlde yiğitbaşımız olan işbu mezbûr Mustafa Odabaşı kendi hâlinde olmayıp müzmin ve hadîdü’l-lisân olduğundan ehl-i ırz ustalarımızın bi-gayr-ı hakkın ırzlarını hetk ve şütûm-ı galîza ile şetm ve muhîll-i nizâm-ı kadîmimiz olan umûra tesâddî ve celb-i menfa‘at için bazılarımıza ifk ü iftirâ ve tekdîr ve ta‘cîz edip el-hâsıl mezbûrun ef‘âl ve akvâl ve ahvâlinden cümlemiz hoşnûd ve râzı değilleriz mezbûr el-Hâc Süleyman dahi merkūmun fesâdına mu‘în bir müteharrik kimesnedir deyü mezbûrândan teşekkî ve fîmâ-ba‘d kendi kâr u kisbleriyle meşgūl olup esnâfımız umûruna müdâhale etmemek üzere ve beynimizde lonca ta‘bîr eylediğimiz cem‘iyetimize gelmemek üzere mezbûrâna kıbel-i şer‘den tenbîh olunmak matlûbumuzdur dediklerinde fîmâ-ba‘d kendi kâr u kisbleriyle meşgūl olup talebleri olmadıkca esnâf-ı mezkûre nizâmlarına ve umûrlarına karışmayıp ve lonca ta‘bîr olunur cem‘iyetlerine varmamak üzere mezbûrâna ba‘de’t-tenbîh onlar dahi ber-minvâl-i muharrer amel ve harekete müte‘ahhid oldukları huzûr-ı âlîlerine i‘lâm olundu. Fî 10 Rebî‘ülevvel sene 1162