Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 100 Hüküm no: 21 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rukiye bt. Mustafa’nın mehir ve alacak iddiasıya muhâlaa yoluyla boşandığı Çukadar Salih b. Abdullah’a açtığı davanın reddedildiği İkrâr-ı muhâla‘a Ma‘rûz Zâtı Mehmed b. Ahmed ve Hüseyin b. Mehmed ile mu‘arrefe olan sahibe-i arzuhâl Şerife Rukiye bt. Mustafa meclis-i şer‘-i enverde derûn-ı arzuhâlde mezkûrü’l-ism zevc-i sâbıkı Çukadâr Salih b. Abdullah muvâcehesinde târih-i i‘lâmdan kırk dört gün mukaddem beni bâyinen tatlîk etmekle iki def‘a akd ve tesmiye ile zimmetinde müctemi‘ olan otuz guruş mehr-i müeccelim ile bi-gayr-ı hakkın yedimden ahz eylediği mecmû‘u yetmiş guruş kıymetli dört miskāl altın gerdanlık ve iki şayak memlû yasdık ve iki yün dolu minder ve bir yemenî yorgan ve iki sırma işleme meşin yemenîsi ve iki sırma işleme oya yemenî ve bir beldâr anteri ve bir keremsûd kaplı sincab kürk ve bir keremsûd anteri ve bir beyaz anteri ve bir evren şâhî cebe ve bir akīk altın yüzük ve bir sırma kulaklı sîm kuşak ve bir mükemmel hamam rahtımı [4a] mevcûde ise a‘yânını müstehleke ise ba‘de’s-sübût kıymet-i şer‘iyesini taleb ederim deyü ba‘de’d-da‘vâ ve’s-suâl mezbûr Salih cevâbında müdde‘iye-i mezbûr mehr-i mezkûr ile zevce-i menkûhası iken târih-i mezkûrda mufârakatlarını ikrâr ancak mufârakat-ı mezkûre müdde‘iye-i mezbûrenin mehr-i mezkûru ve nafaka-i iddet-i ma‘lûmesi ve eşyâ-i mezkûresi üzerlerine ve meûnet-i süknâsı dahi kendi üzerine olmak üzere benimle bi-tarîkı’l-muhâla‘a sulh olup hukūk-ı zevciyet ve gayra müte‘allika âmme-i da‘vâdan benim zimmetimi ibrâ etmişidi deyü mazmûnu takrîr-i meşrûhuna mutâbık hâlâ Mahmudpaşa mahkemesi nâibi fazîletlü Ebûbekir Efendi’nin imzâ ve hâtemini hâvî bir kıt‘a hüccet-i şer‘iye ibrâzıyla olan def‘ini müdde‘iye-i mezbûre dahi ikrâr ve i‘tirâf etmeğin mûcebiyle müdde‘iye-i mezbûre Şerîfe Rukiye Hatun da‘vâ-yı mezkûresiyle zevc-i sâbıkı mezbûr Çukadâr Salih’e bî-vech-i şer‘î mu‘ârazadan men‘ olunduğu bâbdan huzûr-ı âlîlerine i‘lâm olundu. Fî 12 min-Rebî‘ülevvel sene 1162