Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 101 Hüküm no: 22 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Nasuh’un buğday bedelinden Melkon v. Aramya’da olan alacak davasında sulh oldukları 11 guruşa sulh. Bâ-mühr-i hazret-i efendi Ma‘rûz Sahib-i arzuhâl Ali Çelebi b. Nasuh meclis-i şer‘de derûn-ı arzuhâlde mastûrü’l-ism habbâz tâifesinden Melkon v. Aramya nâm zimmî muvâcehesinde şerîkim olup bundan akdem fevt olan el-Hâc Osman b. el-Hâc Mustafa ile ale’l-iştirâki’s-seviy mülkümüz olan dört yüz keyl hıntamızı bin yüz elli üç senesinde beher keyl yüz elli akçeye olmak üzere işbu mesfûr Melkon zimmîye müteveffâ-yı mezbûr ile ma‘an bey‘ ve teslîm etmişidik el-hâletü hâzihî nısfı olan iki yüz keylin semeni olan iki yüz elli guruşu mesfûrdan taleb sadedinde olduğumda ol dahi hınta-i mezkûru şerîkim el-Hâc Osman’dan iştirâ ve kabz ve semenini bi’t-tamam ol târihde teslîm eyledim demekle beynimizde ba‘de vukū‘ı’l-münâza‘âti’l-kesîre tavassut-ı muslihîn ile mesfûr Melkon ile da‘vâ-yı mezkûremden işbu meclis-i şer‘de makbûz on bir guruş bedel mukābelesinde sulh olup hınta-i mezkûrenin bâkī semenine müte‘allik âmme-i de‘âvî ve mutâlebâtdan mesfûr Melkon zimmînin zimmetini ibrâ-i âm ile ibrâ ve ıskāt eyledim dediğini mesfûr Melkon zimmî tasdîk ve ibrâ-i merkūmu kabûl edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 10 Rebî‘ülevvel sene 1162