Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 105 Hüküm no: 28 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi Hacı Mustafa b. Ali’nin Şirugancı Hacı Süleyman b. Hasan’a kalan borcunu ödemesi Ma‘rûz Şîrugancı tâifesinden el-Hâc Süleyman b. Hasan meclis-i şer‘de ve çörekçi tâifesinden el-Hâc Mustafa b. Ali muvâcehesinde benim iki yüz iki guruş kırk bir akçe deyn ile medyûnum olan yine çörekçi tâifesinden Sarıgörez fırını ustası gāib ani’l-meclis el-Hâc Mehmed nâm kimesne deyn-i mezkûrile üçümüz bir meclisde olduğumuz hâlde işbu mezbûr el-Hâc Mustafa üzerine mutlaka ba‘de’l-ihâle ve’l-kabûl mezbûr el-Hâc Mustafa’da elli iki guruş kırk bir akçe hakkım bâkī kalmağla taleb ederim deyü ba‘de’d-da‘vâ ve’s-suâl mezbûr el-Hâc Mustafa cevâbında fi’l-vâki‘ kazıyye minvâl-i muharrer üzere olduğunu ikrâr lâkin deyn-i mezkûrun iki yüz guruşunu müdde‘î-i mezbûra edâ ve teslîm edip deyn-i meblağ-ı mezbûrdan zimmetimde ancak iki guruş kırk bir akçe bâkī kalıp hatta mezbûr el-Hâc Süleyman deyn-i meblağ-ı mezkûrun iki yüz guruşunu benden ahz u kabz eylediğini târih-i kitâb günü huzûr-ı Müslimînde ikrâr dahi etmişidi deyü ba‘de’d-def‘ ve’l-inkâr mezbûr el-Hâc Mustafa def‘-i meşrûhunu ahrâr-ı ricâl-i Müslimînden lede’t-tezkiye adâletleri zâhir olan Ömer Efendi b. Nurullah Efendi ve Ali Çelebi b. Abdullah şehâdetleriyle mezbûr el-Hâc Süleyman muvâcehesinde vech-i şer‘î üzere ba‘de’l-isbât ve’l-kabûl mûcebiyle müdde‘î-i mezbûr deyn-i mezkûrdan bâkī olmak üzere müdde‘âsı olan elli iki guruş kırk bir akçenin elli guruş mutâlebesiyle mezbûr el-Hâc Mustafa’ya bî-vech-i şer‘î mu‘ârazadan ba‘de’l-men‘ mezbûr el-Hâc Mustafa’nın ikrârı üzere zimmetinde bâkī kalan iki guruş kırk bir akçeyi müdde‘î-i mezbûra edâ ve teslîmle mezbûr el-Hâc Mustafa’ya tenbîh olunduğu mahkeme-i bâbdan huzûr-ı âlîlerine i‘lâm olundu. Fî 13 min-Rebî‘ülevvel sene 1162