Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 106 Hüküm no: 29 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dikici esnafının hal ve hareketlerinden memnun oldukları Dikicibaşı İsmail Çelebi b. İbrahim’in aynı görevde ibkası Dikicibaşılık. Bâ-mühr-i hazret-i efendi Ma‘rûz Dikici tâifesinden Ali Çelebi b. Mehmed ve Mahmud b. Ebûbekir ve es-Seyyid Mustafa ve Abdülkadir Çelebi ve Ahmed Çelebi ve Mustafa Çelebi ve Ali b. Halil ve Mahmud b. Halil ve İbrahim b. Hüseyin ve el-Hâc Ahmed b. Ahmed ve Mustafa b. Mehmed ve İsmail b. İsmail ve es-Seyyid Mehmed b. Mustafa ve Halil b. Veli ve Mustafa b. Yusuf ve Osman b. Yusuf ve Mustafa b. İbrahim ve es-Seyyid İbrahim b. Ahmed ve Mustafa b. Ali ve Ahmed b. Abdullah ve zimmî köşe ustalarından Mikail v. Andon ve Agop v. Vartan ve Nezaret v. Artin ve Abram ve Karabet ve Kigork ve Agop ve Ohan ve Bogos ve Ohannes ve Artin ve Markar ve Dimitri ve Karabet ve Yani ve Maksad ve Avanis ve Dunik ve Mankasar ve Haçador ve âhar Haçador ve Markar ve Artin ve Minas ve sâir ustalardan Simaven ve Manuk ve Mardiros ve Artin ve Sirab ve Serur ve Serkiz ve Ağya ve Şahbaz ve Mıgırdıç ve Asvador ve Karabet ve İskender ve Nikola ve Agop ve Avanis ve Mancuk ve Yorgi ve Zaharya ve Manuk ve Pedros ve Agop ve Aleksan ve Arakil ve sâir Müslim ve zimmî ustalardan üç yüz neferden mütecâviz mazbûtü’l-esâmî ustalar meclis-i şer‘de derkenârda mezkûrü’l-ism cümlesinin muhtârı olmağla bâ-berat-ı âlîşân dikicibaşıları olan İsmail Çelebi b. İbrahim ve Arasta-i kebîr kethudâsı Hâfız es-Seyyid Mehmed ve Çizmecibaşı el-Hâc Halil ve Arasta yiğitbaşısı Ahmed ve dikici ustalarından Kasım ve Ali Usta ve Ömer ve Ebûbekir ve Musa ve Mehmed ve Hasan ve sâir mazbûtü’l-esâmî yirmi neferden mütecâviz ustalar muvâcehelerinde hâlâ bâ-berat-ı âlîşân dikicibaşımız ve muhtârımız olan işbu İsmail Çelebi dikicibaşı olduğu günden bu âna gelince esnâfımızdan bir kimesneyi bi-gayr-ı hakkın tekdîr ve ta‘cîz etmeyip tamam nizâmımız üzere hareket etmekle cümlemiz kendiden hoşnûd ve râzı iken işbu haffâflar kethudâsı ve sâir yirmi sekiz nefer ustalar birbirleriyle yek-dil olup mezbûr İsmail’i ref‘ ettirdip yerine âharı nasb ettirmek sevdâsıyla hilâf-ı vâki‘ teşekkî sadedinde olmuşlar mezbûrlar bu husûsu me’kel ittihâz edip zamân-ı kalîlde celb-i menfa‘atleri’çün bu makūle bî-vech azl ve nasb ettirmeğe sa‘y ederler hakīkat-i hâl ve keyfiyetleri ma‘lûm olmak için istintâk olunmaları ve mezbûr İsmail Çelebi’den cümlemiz hoşnûd ve râzı olup muhtârımız olmağla kemâ-kân dikicibaşılığı ibkā olunmak matlûbumuzdur dediklerinde fi’l-hakīka mezbûrûn istintâk olundukda merkūm dikicibaşıdan şikâyetler hemân nizâmımıza ihtilâl verip ne vechile ihtilâl verdiğini beyâna kādirler olmayıp ve bir kimesneyi dahi bi-gayr-ı hakkın tekdîr ve ta‘cîzini kezâlik beyân edemediler el-hâsıl mezbûrların celb-i menfa‘at için kelimât-ı bî-hûde söyledikleri zâhir olmağın merâmlarına müsâ‘ade olunmayıp cümlesinin muhtârı ve hüsn-i hâli mübeyyin ve zâhir olan mezbûr İsmail Çelebi’nin kemâ-kân dikicibaşılığı ibkā buyurulmak bâbında istid‘â ve istirhâmları ma‘lûm-ı devletleri buyurulmakda emr [ü] fermân hazret-i veliyyü’l-emrindir. Fî 18 Rebî‘ülevvel sene 1162