Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 107 Hüküm no: 30 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Süleyman Efendi b. İbrahim’in vefat eden Abdülbaki Efendi b. Hüseyin’e olan borcu ve rehin bıraktığı eşyaların geri verilmesi davasında Abdülbaki’nin varisi Hasan Odabaşı ile sulh yoluyla anlaştıkları Ma‘rûz Rumeli kuzâtından Süleyman Efendi b. İbrahim meclis-i şer‘-i enverde yine Rumeli kuzâtı eşrâfından mukaddemâ vefât eden Abdülbaki Efendi b. Hüseyin’in li-ebeveyn karındaşı ve hasran vârisi Hasan Odabaşı muvâcehesinde müteveffâ-yı mezbûra hayatında malından ve yedinden istikrâz ve ahz eylediğim elli guruş mukābelesinde mecmû‘u doksan beş guruş kıymetli bir sarı hindî şâl ve bir zerdevâ kürk ve üç aded kitâb ve bir boğçamı rehin ve teslîm ol dahi yedimden ba‘de’l-ahz ve’l-kabz deyn-i mezkûrumun yirmi guruşunu hayatında müteveffâ-yı mezbûra edâ ve otuz guruşunu dahi işbu vâris-i mezbûr hâlâ yedimden ahz etmekle rihân-ı mezkûremi taleb ederim deyü da‘vâ ve vâris-i mezkûr dahi deyn-i mezkûrun otuz guruşunu kendi ahzını ikrâr lâkin mûris-i mezbûrun hayatında yirmi guruşunu ve rihân-ı mezkûreyi ahz[ını] inkâr etmeğin müdde‘î-i mezbûr müdde‘âsını ahrâr-ı ricâl-i Müslimînden Mehmed b. Ahmed ve Süleyman b. Hasan nâm kimesneler şehâdetleriyle isbât edip tezkiye esnâsında iken beynimize muslihûn [tavassut] edip da‘vâ-yı mezkûremden beni mezbûr Hasan Odabaşı ile yirmi beş buçuk guruş bedel-i makbûza ba‘de’s-sulh ve’l-kabûl herbirimiz mâ‘adâ müdde‘âlarımıza müte‘allika âmme-i da‘vâdan âharın zimmetini ibrâ ve ıskāt eyledik deyü olan ikrârını vâris-i mezbûr Hasan Odabaşı’nın tasdîk eylediği mahkeme-i bâbdan huzûr-ı âlîlerine i‘lâm olundu. Fî 15 min-Rebî‘ülevvel sene 1162