Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 357 Hüküm no: 524 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey’in kölesi Gazanfer’in Mahmud Beşe’nin kölesi Yusuf’un çeşmede kafasına güğüm atarak ölümüne sebep olduğu Mahmiye-i İstanbul’da Samanveren Mahallesi’nde sâkin işbu bâ‘isü’l-kitâb Mahmud Beşe b. Ömer mahfil-i kazâya gelip takrîr-i kelâm ve bast-ı berâm edip mahalle-i mezbûrede sâkin Ahmed Bey b. Kasım’ın abd-i memlûkü Gazanfer târîh-i kitâbdan bir gün mukaddem Yusuf nâm abd-i memlûkümü Şatır Ali Bey Çeşmesi’nde su alırken güğümün atıp ve mezbûr Yusuf’u ahz edip başını darb-ı şedîd ile darbedip hattâ boynunun sol cânibini kara bere edip mecrûhen nısfü’l-leylde fevt olmuşdur, üzerine varılıp keşf ve tahrîr olunması matlûbumdur dedikde mahkeme-i şerîfeden mevlânâ Mustafa Efendi irsâl olunup ol dahi zeyl-i kitâbda mastûrü’l-esâmî olan Müslimîn ile varıp nazar eylediklerinde fi’l-vâki‘ mezbûr Yusuf’un boynu vech-i muharrer üzere kararıp beresi olduğunu müşâhede eylediklerinden sonra mevlânâ-yı mezbûr vâki‘ hâli mahallinde tahrîr ba‘dehû cânib-i şer‘den ma‘an irsâl olunan Hasan Beşe b. Abdullah ve Rıdvan b. Abdullah ile gelip herbiri vukū‘u üzere meclis-i şer‘de inhâ ve takrîr etmeğin mâ-vaka‘a bi’t-taleb ketb olundu. Tahrîren fi’s-sâmin ve’l-ışrîn min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Mustafa Efendi b. Mehmed el-imâm, Sefer Halîfe b. İbrahim el-müezzin, Yusuf Bey b. Abdullah, Himmet Beşe b. Mehmed, Yusuf Halîfe b. <> Abdullah, İsmail Beşe b. el-Hâc Mehmed, Hüseyin Çelebi b. Seyfullah, Arslan Beşe b. İsmail, Usta İlyas b. Memi, Habib b. Mustafa, el-Hâc İsmail b. Müstecab, Ahmed b. Mahmud ve gayruhum.