Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 108 Hüküm no: 31 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalcı Kalef’in cariyesi Fâtıma’nın Müslüman ve hür olduğu iddiasıyla açtığı davada hür olduğunu ispat edemediği; ancak Müslüman olduğundan Müslüman bir kişiye satılmasına karar verildiği Ma‘rûz Rıkka inkıyâdını mu‘terife orta boylu kara gözlü kara kaşlı sâbıkā ve hâlâ Fâtıma ismiyle müsemmât olan sahibe-i arzuhâl meclis-i şer‘de mezbûreye kâfiretü’l-mille rakīka olmak üzere vâzı‘u’l-yed olan Kalcı Kalef Yahûdî ile terâfu‘larında ben diyâr-ı Acem’de Gence kasabası ahâlîsinden Hüseyin nâm hürr-i Müslimin sulbiye kızı olup bana ve ebeveynime rık târî olmamış iken mesfûr Yahûdî bana kâfiretü’l-mille rakīka olmak üzere vaz‘-ı yed eder suâl olunup sebîlim tahliye olunmak murâdımdır deyü ba‘de’d-da‘vâ ve’s-suâl mesfûr Yahûdî ben mezbûreyi Gürciyyetü’l-asl kâfiretü’l-mille olmak üzere malım ile mahzar-ı şühûdda iştirâ eyledim mezbûrenin hürre olduğu ma‘lûmum değildir dedikde mezbûre Fâtıma müdde‘âsını beyân için bi’d-defa‘ât ba‘de’l-istimhâl ve’l-imhâli’ş-şer‘î herbirinde müddet-i mehl tamam olup bir vechile beyyine-i ikāmete kādire olmayıp tahlîfe dahi tâlibe olmadığından tahlîs-ı rakabesine müsâ‘ade-i şer‘iye olmayıp lâkin mezbûre Müslime olduğunu mukırre olup ihtiyâten yine meclis-i şer‘de İslâm’ı kabûl ve mecmû‘-ı edyân-ı bâtıladan teberr[î] eylediği ba‘de’t-tescîl mezbûrenin ehl-i İslâm’dan bir kimesneye şer‘an bey‘i iktizâ etmekle mezbûreyi ehl-i İslâm’dan bir kimesneye bey‘ etmek üzere mesfûr Kalcı Kalef Yahûdî’ye tenbîh-i şer‘î olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 18 Rebî‘ülevvel sene 1162