Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 109 Hüküm no: 33 Orijinal metin no: [5b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katledilen Ahmed b. Mehmed’in varislerinin, katlinden sorumlu tuttukları Makarnaoğlu Mehmed b. Yakub ve Sunullah b. Hasan ile diğerlerine açtıkları davadan vazgeçip, katilin Esiroğlu İbrahim olduğunu beyan ettikleri Bâ-mühr-i hazret-i efendi Ma‘rûz Bundan akdem katîlen fevt olan Ahmed b. Mehmed b. Süleyman’ın verâseti zevce-i metrûkesi Hadîce bt. Mehmed nâm hatun ile babası mezbûr Mehmed’e münhasıra olduğu lede’ş-şer‘i’l-enver mütehakkık oldukdan sonra zevce-i mezbûre Hadîce zâtı ba‘de’t-ta‘rîf ve babası mezbûr Mehmed dîvân-ı âlîlerinde ma‘kūd meclis-i şer‘de ashâb-ı arzuhâl Makarnaoğlu Mehmed b. Yakub ve İbrahim Beşe b. Osman ve es-Seyyid Mahmud b. İbrahim ve Sunullah b. Hasan ve Ali b. Eyüb nâm kimesneler mahzarlarında târih-i i‘lâmdan kırk yedi gün mukaddem Samatya kurbünde Danayokuşu nâm mahâlde Cumartesi gecesi kabîl-i ışâda katîl-i mezbûr Ahmed’i işbu hazır bi’l-meclis Makarnaoğlu Mehmed çehresinin sol cânibinden bir yerde ve gāib ani’l-beled Esiroğlu İbrahim nâm kimesne sol memesi üzerinden bir yerde bıçak ta‘bîr olunur âlet-i câriha ile bi-gayr-ı hakkın amden darb ve cerh eylediler ve işbu mezbûr Sunullah b. Hasan katîl-i mezbûrun hîn-i cerhden ellerini tutup dâriblere i‘ânet eyledi ve bâkī üçü ancak refîkleri idi ve katîl-i mezbûr cerh-i mezkûrdan müteessiren der-akab fevt olmağla mûceb-i şer‘îsini mezbûr Makarnaoğlu Mehmed ile merkūm Sunullah’dan taleb ederim deyü bundan akdem bi’l-verâse da‘vâ sadedinde olmuşidik lâkin el-hâletü hâzihî mûrisimiz katîl-i mezbûr Ahmed’i ancak gāib-i mezbûr Esiroğlu İbrahim ber-minvâl-i muharrer bi-gayr-ı hakkın amden darb ve cerh ve müteessiren fevt olduğu ve mezbûr Makarnaoğlu Mehmed’in ve Sunullah’ın ve sâir refîklerinin darb [6a] ve cerhde kat‘a alâka ve medhalleri olmadığı ma‘lûmumuz olmağla müdde‘âmızı ancak gāib-i mezbûr Esiroğlu İbrahim’e kasr edip işbu mezbûrândan eylediğimiz da‘vâmızdan herbirimiz fâriğ olup husûs-ı mezkûra müte‘allik âmme-i de‘âvî ve mutâlebât ve kâffe-i eymân ve muhâsamâtdan mezbûrân Makarnaoğlu Mehmed ve Sunullah’ın ve merkūmûn İbrahim Beşe ve es-Seyyid Mahmud ve Ali’nin herbirinin herbirimiz zimmetlerini ibrâ-i âm ile ibrâ ve ıskāt eyledik fîmâ-ba‘d mezbûrlar ile vechen mine’l-vücûh ve sebeben mine’l-esbâb kat‘a da‘vâ ve nizâ‘ ve husûmetimiz yokdur dediklerinde mezbûrûndan herbiri merkūmânın ibrâlarını kabûl eyledikleri huzûr-ı âlîlerine i‘lâm olundu. Fî 20 Rebî‘ülevvel sene 1162