Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 110 Hüküm no: 34 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manav esnafından Seyyid Ali’nin şakirdi olan Ali’ye ayrı dükkân açmasına izin verilmediği Bâ-mühr-i hazret-i efendi Ma‘rûz Manav tâifesinden sahib-i arzuhâl es-Seyyid Ali meclis-i şer‘de şâkirdi olan Ali nâm kimesne muvâcehesinde pazarbaşıları Abdurrahman Çelebi ve ustalarından el-Hâc Süleyman ve diğer el-Hâc Süleyman ve es-Seyyid el-Hâc Hüseyin ve Osman Odabaşı ve es-Seyyid Osman ve Ali Odabaşı ve es-Seyyid İbrahim ve Mustafa Yazıcı ve es-Seyyid Hüseyin ve Ali Yazıcı hazırlar oldukları hâlde mezbûr Ali henüz benim şâkirdim olup nizâm-ı kadîmimiz üzere müstakillen dükkânda olmağla müsta‘id değil iken benim elli seneden beri taht-ı icâremde olup Kumkapı’da vâki‘ dükkânımı sahibinden istîcara tâlib ve nizâm-ı kadîmimizin ihtilâline bâdî olmağla hilâf-ı nizâm-ı kadîm hareket etmeyip ve bilâ-taleb esnâfımız umûruna karışmamak üzere mezbûr Ali’ye tenbîh olunmak matlûbumdur dedikde mezbûrûn ustalar dahi merkūm Ali henüz şâkird olup müstakillen dükkânda olmağa müsta‘id değildir ve harekât ve evzâ‘ı nizâm-ı kadîmimizin ihtilâline bâdî olduğundan ber-minvâl-i muharrer mezbûra tenbîh olunmak cümlemizin merâmımızdır dediklerinde mezbûr Ali dahi dükkân-ı mezkûru istîcardan kendi rızâsıyla fâriğ ve ba‘de’l-yevm hilâf-ı nizâm-ı kadîm hareket etmemek üzere ve talebleri olmadıkca esnâfı umûruna kat‘a karışmamak üzere ta‘ahhüd etmekle mezbûrun ta‘ahhüdü ba‘de’t-tescîl bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 20 Rebî‘ülevvel sene 1162