Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 110 Hüküm no: 35 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kardeşi İstefan’a olan borcundan dolayı hapsedilen Arzuman’ın serbest bırakılması Habsden ıtlâk Ma‘rûz Sahib-i arzuhâl olup hâmiş-i arzuhâlde mezkûr olduğu karındaşı İstefan nâm zimmîye bâ-i‘lâm-ı şer‘î üç yüz seksen guruş deyn mutâlebesiyle sicn-i sultânîde ve muhzır ağa tomruğunda yedi buçuk ay mahbûs olan Arzuman zimmî meclis-i şer‘-i enverde deyn-i mezkûrunun elli guruşuna süknâsına muhtâc olduğu bir bâb menzilini dahi dâyin-i mezkûra bey‘ ve teslîm edip mâ‘adâsını edâya bir vechile iktidâr olmayıp mu‘dim ve mu‘sir olduğu hâline vukūf-ı tâmları olan Lefter v. Apostol ve Andon v. Durmuş ve Mihal v. Anaştaş ve Sava v. Kostantin ve Simaven v. Apostol ve Kostantin v. Peradmur ve Mardiros v. Norsiz nâm zimmîler meclis-i şer‘de karındaşı ve dâyini mesfûr İstefan zimmî muvâcehesinde alâ-tarîkı’ş-şehâde ihbârlarıyla zâhir oldukda karındaşı dâyin-i mesfûr İstefan zimmî dahi yesârını beyâna kādir olamadığından gayri medyûn-ı mahbûs-ı mesfûrun mu‘dim ve mu‘sir olduğunu ikrâr ve i‘tirâf etmeğin mûcebiyle medyûn-ı mahbûs-ı mezkûrun vakt-i müyesserine değin habsinden ıtlâk ve tâlib-i mesfûrun eyne mâ dâre’l-medyûn mülâzemetinden adem-i men‘i iktizâ eylediği mahkeme-i bâbdan huzûr-ı âlîlerine i‘lâm olundu. Fî 21 Rebî‘ülevvel sene 1162