Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 115 Hüküm no: 44 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Filiboz’un kendisini dövüp yaralayanların Makbuli, Kel Aya, Cin Agop ve Avadik olduğunu beyan ettiği Ma‘rûz Sahib-i arzuhâl Filiboz zimmî meclis-i şer‘-i enverde sulbî kebîr oğlu derûn-ı arzuhâlde mezkûrü’l-ism olan Serkiz zimmîyi târih-i i‘lâmdan bir gün mukaddem deryâda Baruthâneönü nâm mahâlde kayık içinde eşkıyâdan Makbuli ve Kel Aya ve Cin Agop ve Avadik nâm zimmîler kerki ve basamak ta‘bîr olunur kebîr odun ile bi-gayr-ı hakkın darb-ı şedîd ile darb ve cemî‘ a‘zâsını kara bere edip hâlâ sahib-i firâş etmeleriyle oğlu mesfûrun üzerine varılıp âsâr-ı darbı keşif ve dâriblerinden istintâk olunmasını taleb etmekle kıbel-i şer‘-i enverden irsâl olunan Mehmed Reşid Efendi mahmiye-i İstanbul’da Samatyakapısı dâhilinde Hacı Hüseyin mahallesinde madrûb-ı mesfûrun yatdığı menzile varıp huzûr-ı Müslimînde ba‘de akdi’l-meclis madrûb-ı mesfûrun ba‘de’l-keşf ve’n-nazar a‘zâsı kara bere olup sahib-i firâş olduğunu mu‘âyene edip ve dâriblerinden dahi ba‘de’l-istintâk madrûb-ı mezkûr dâribleri bâlâda mezkûr olan Makbuli ve Kel Aya ve Cin Agop ve Avadik zimmîlerdir deyü takrîrini kâtib-i mezbûr mahâllinde ketb ü tahrîr ba‘dehû ma‘an ba‘s olunan ümenâ-i şer‘-i enver ile gelip alâ-vukū‘ihî meclis-i şer‘a inhâ ve takrîr eylediği Mahkeme-i Bâb’dan huzûr-ı âlîlerine i‘lâm olundu. Fî 24 min-şehri Rebî‘ülevvel sene 1162