Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 116 Hüküm no: 45 Orijinal metin no: [7a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksan bt. Yamandi ile Dimitri Papas v. Pelaş’ın birbirlerindeki alacak davasında sulh olup zimmetlerini ibra ettikleri Ma‘rûz Aleksan bt. Yamandi nâm Nasrâniye şahsı ba‘de’t-ta‘rîfi’ş-şer‘î dîvân-ı âlîlerinde ma‘kūd meclis-i şer‘de sahib-i arzuhâl Dimitri Papas v. Pelaş muvâcehesinde mezbûr zimmetinde cihet-i karz-ı şer‘îden beş yüz guruş hakkım olmağla bundan akdem meblağ-ı mezkûru mesfûrdan taleb ve da‘vâ eylediğimde ol dahi benim müdde‘âmı bi’l-külliye inkârından mâ‘adâ benim dahi senin zimmetinde icâre-i menzilden otuz altı guruş ve cihet-i karzdan yüz on dört guruş ki cem‘an yüz elli guruş hakkım var idi târih-i i‘lâmdan on beş gün mukaddem sen müdde‘ân olan beş yüz guruş mutâlebesinden ben dahi müdde‘âm olan yüz elli guruş mutâlebesinden fâriğ olup herbirimiz âharın zimmetini âmme-i da‘vâdan ibrâ etmişidik deyü def‘ edip ben dahi inkâr etmemle mesfûr Dimitri Papas def‘-i meşrûhunu beyâna havâle olunup beynimizde bu vechile ba‘de vukū‘ı’l-münâza‘a tavassut-ı muslihûn ile el-hâletü hâzihî da‘vâ-yı mezkûremden merkūm Dimitri Papas ile altmış guruş ve iki yasdık ve bir minder ve bir yorgan bedel-i makbûz mukābelesinde sulh olup müdde‘âm olan beş yüz guruşdan bâkī dört yüz kırk guruş mutâlebe ve İstanbul’da Salmatomruk’da vâki‘ vakıf menzil husûsuna müteallik da‘vâdan ve târih-i i‘lâma gelince sâir beynimizde cereyân eden hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan mesfûr Dimitri Papas’ın zimmetini ibrâ-i âm ve kātı‘u’n-nizâ‘la ibrâ ve ıskāt eyledim kezâlik ol dahi müdde‘âsından ve sâir târih-i kitâba gelince hukūkuna müte‘allika âmme-i de‘âvî ve mutâlebâtdan benim zimmetimi ibrâ edip ba‘de’l-yevm herbirimizin âhar ile vechen mine’l-vücûh [7b] ve sebeben mine’l-esbâb kat‘a da‘vâ ve nizâ‘ ve husûmetimiz yokdur dediğini mesfûr Dimitri Papas tasdîk ile ba‘de’t-tescîl bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 24 Rebî‘ülevvel sene 1162