Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 120 Hüküm no: 52 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Mami v. Hristodoli’nin Lokmacı Osman’a sattığı hileli yağı geri alıp parasını iade etmesi Ma‘rûz İstanbul’da İbrahim Paşa Hamamı civârında Lokmacı Osman meclis-i şer‘-i enverde şîrugancı esnâfından Mami v. Hristodoli zimmî muvâcehesinde mukaddemâ merkūm Mami zimmînin beher vakıyyesi otuz üçer akçeye sâfî hâlis şîrugan olmak üzere dokuz yüz dört akçe semen-i makbûza bana bey‘ ve teslîm eylediği mu‘âyene olunan işbu dester derûnunda olan yirmi yedi buçuk vakıyye yağ revgan-ı zeyt ile mahlût olmak aybıyla mu‘ayyeb olmağla bi-hükmi hıyâri’l-ayb fesh-i bey‘le mebî‘-i mezkûru red ve semen-i mezkûru istirdâd ederim deyü ba‘de’d-da‘vâ ve’s-suâl merkūm Mami zimmî cevâbında fi’l-vâki‘ ber-vech-i muharrer zikrolunan dester ile hâlis olmak üzere şîrugan bey‘ ve kabz-ı semen eylediğini ve hâlâ dester-i mezkûr derûnunda olan yağ dahi mu‘ayyeb olduğunu ikrâr lâkin yağ-ı mezkûr benim bey‘ ettiğim yağ değildir deyü olan da‘vâsında kavl-i kābızın olmağla müdde‘î-i mezbûr zikrolunan yağ mebî‘-i mezkûr olup tebdîl etmediğine ba‘de’t-tahlîf ve’l-halfi’ş-şer‘î mûcebiyle zikrolunan yağı bi-hükmi’l-aybi’l-mezkûr geriye ahz ve semen-i mezkûru müşteri-i mezbûra red ile merkūm Mami zimmîye tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 29 Rebî‘ülevvel sene 1162