Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 121 Hüküm no: 53 Orijinal metin no: [8a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirugan esnafının, Şirugancı Mami v. Hristodoli’nin hileli yağ sattığından esnaflıktan çıkarılması talepleri Ma‘rûz Mahmiye-i İstanbul’da şîrugancı esnâfının kethudâsı Ahmed Ağa b. Ali ve ustalarından es-Seyyid el-Hâc Ali Çelebi b. es-Seyyid Süleyman ve Molla Mehmed b. İbrahim ve Hamza Beşe b. Abdülmuttalib ve Molla Mehmed b. Osman ve Nu‘man Çelebi b. Ali ve Abdülkerim b. İbrahim nâm kimesneler ile Angeli v. İlya ve Bukharun v. Melet ve Sarafin v. Aslan ve Pandazi v. Vasil ve Kostantin v. Tarafnus ve Todori v. Menet nâm zimmîler meclis-i şer‘-i enverde yine mahmiye-i mezbûrede Eskiodalar başında vâki‘ ma‘lûmü’l-hudûd şîrugan kârhânesi ustası olan Mami v. Hristo zimmî muvâcehesinde bizim şîruganı hâlis şîrugan bey‘ edip âhar yağa karışdırmamak kadîmî nizâmımız iken merkūm Mami öteden beri kârhânesinde nizâm-ı mezkûrumuza mugāyir şîrugana bezir yağı ve zeyt yağı karışdırıp bey‘ eder olup kirâren ve mirâren men‘iyle tenbîh olunup yine mütenebbih olmayıp hatta târih-i i‘lâm günü Lokmacı Osman nâm kimesneye bey‘ eylediği bir dester şîruganı revgan-ı zeyt ile mahlût olmağla mesfûrun ber-vech-i muharrer vaz‘ ve hareketi kadîmî nizâmımıza mugāyir olup esnâfımıza ihtilâl îrâs ve nâsa ızrâr eder hâlâtdandır deyü zimmî-i merkūmun sû’-i hâlini ihbâr ve salâhı zâhir olunca san‘at-ı mezkûreyi işlemekden men‘ ile ta‘zîr olunması bâbında fermân-ı âlî ricâsında oldukları huzûr-ı âlîlerine i‘lâm olundu. Fî 29 Ra sene 1162