Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 121 Hüküm no: 54 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kafesci esnafının talepleriyle nizamlarına uymayan Hüseyin b. Osman’ın esnaflıktan menedildiği Ma‘rûz İstanbul’da kafesci esnâfının kethudâları Mustafa Ağa b. Ahmed ve Yiğitbaşı Ali Beşe b. Hüseyin ve Ali b. Ahmed ve Mustafa b. Halil ve es-Seyyid Ahmed b. Mustafa ve İbrahim b. Hüseyin ve Halil b. Süleyman ve Osman b. Ahmed ve Yusuf b. Osman ve Mehmed b. İbrahim ve Mehmed b. Hacı Abdurrahman ve Hüseyin b. Mustafa ve es-Seyyid el-Hâc Mehmed b. Halil nâm kimesneler meclis-i şer‘-i enverde esnâf-ı mezkûre ustalarından Hüseyin b. Osman muvâcehesinde mezbûr Hüseyin esnâfımız ustalarından olup ancak öteden beri vaz‘ ve hareketi nizâm-ı kadîmimize mugāyir olup kethudâ ve yiğitbaşı ve ihtiyâr [ve] muhtâr ustalarımızın nizâm-ı kadîmimiz üzere olan umûr ve husûsumuzun rü’yet ve temşiyetinde cümlemize muhâlefet edip esnâfımız ustaları nizâmlarına ihtilâl verdiğinden mâ‘adâ herbirimize ta‘zîri mûceb elfâz ile şütûm-ı galîza edip ırzlarımızı hetk eder deyü da‘vâ ve mezbûr Hüseyin’in salâhı zâhir olunca san‘at-ı mezkûreyi işlemekden men‘ile ta‘zîr olunmasını iltimâs eylediklerinde mezbûr Hüseyin dahi fîmâ-ba‘d san‘at-ı mezkûreyi işlememeğe ta‘ahhüd edip ol vechile kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî-gurreti şehri Rebî‘ülâhir sene 1162