Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 122 Hüküm no: 55 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Beşe b. Abdullah b. Abdurrahman’a borcundan dolayı hapsedilen Seyyid Veli b. Mustafa’nın borcunu taksitler halinde ödemeyi taahhüt ettiği Ma‘rûz Dergâh-ı âlî yeniçerilerinin onikinci bölük yoldaşlarından hâmiş-i arzuhâldeki derkenârda mezkûr dâyin Musa Beşe b. Abdullah b. Abdurrahman tarafından husûs-ı âti’z-zikre vekîl olduğu es-Seyyid Ali b. Mehmed ve Mumcu Ali Beşe b. Mustafa şehâdetleriyle sâbit ve sübût-ı vekâleti ber-nehc-i şer‘î mahkûmun-bih olan el-Hâc Osman b. el-Hâc Abdullah meclis-i şer‘-i enverde sahib-i arzuhâl olup hâmiş-i arzuhâlde mezkûr olduğu üzere müvekkil-i mezbûra beş yüz kırk beş guruş deyn için târih-i i‘lâma gelince yüz beş gün habsolunan es-Seyyid Veli b. Mustafa muvâcehesinde ve mezbûr es-Seyyid Veli’nin li-ebeveyn karındaşları es-Seyyid Mustafa ve es-Seyyid Mehmed dahi hazırlar olduğu hâlde işbu mahbûs-ı mezkûr es-Seyyid Veli fakīr ve mu‘sir olup deyn-i mezkûrunu def‘aten edâya iktidârım yokdur deyü taksîte tâlib olmağla ben dahi bi’l-vekâle deyn-i mezkûrundan beher şehr bin akçe ki beher senede on iki bin akçe verip târih-i kitâbdan beş buçuk sene tamamına değin edâ etmek üzere karındaşı işbu hâzır-ı mezbûr es-Seyyid Mustafa ber-vech-i muharrer bedel-i taksîte mezkûrun edâsına dâmin olup ve taksît-i mezkûrdan mezbûr es-Seyyid Mustafa’nın bi’l-kefâleti’l-mezkûre zimmetine lâzım gelen meblağa diğer karındaşı hâzır-ı mezbûr es-Seyyid Mehmed dahi kefîl olmağla mezbûr es-Seyyid Veli’yi mukāssaten tecîl eylediğimde ol dahi ba‘de’l-kabûl deyn-i mezkûrunu müvekkil-i mezbûra ber-taksît-i mezkûr edâya ta‘ahhüd eyledi deyü olan vekîl-i mezbûrun bi’l-vekâle ikrârını medyûn-ı mezbûr es-Seyyid Veli ve karındaşları hâzırân-ı mezbûrân es-Seyyid Mustafa ve es-Seyyid Mehmed’den herbirinin tasdîk eylediği Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî-gurreti şehri Rebî‘ülâhir sene 1162