Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 122 Hüküm no: 56 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aya Kostantin Kilisesi papazları ve ahalilerinin kiliselerinde nizama ve usüllerine aykırı olarak papas olan Keşiş Presfus v. Paskal’ın keşişliğinin iptal edilmesi talepleri Bâ-mühr-i hazret-i efendi. Keşiş i‘lâmı Ma‘rûz Ashâb-ı arzuhâl İstanbul’da Samatya kurbünde Aya Kostantin Kilisesi papaslarından Papa Nikola ve Papa Tari ve Papa Londri ve Papa Yani ve diğer Papa Yani ve Matoli Paskal ve ahâlîsinden Hrito ve Dimitraki ve Yorgi ve Sundi ve Kü[r]kçü Yorgi ve Kazgancı Dimitri ve Kuyumcu Paskal ve Safiri ve Panderi ve Yorgaki ve Londri ve Mihalaki ve Yorgaki ve Kostantin ve Ligori ve Meço ve Tanaş ve Korti ve Vasil ve Panayot ve Kosta ve sâir mazbûtü’l-esâmî yüz elli neferden mütecâviz zimmîler meclis-i şer‘de derkenâr olunan emr-i âlîşânda mezkûrü’l-ism Presfus Keşiş v. Paskal muvâcehesinde ez-kadîm kilise-yi mezkûrda icrâ-yı âyin-i âtılamız için sekiz aded gedikli papas olup içlerinden biri hâlik olsa cümle ma‘rifeti ve patrik ma‘rifetiyle yerine bir müteehhil ve ehl-i ırz papas vaz‘ olunagelmişiken ecânibden işbu Presfus Keşiş târih-i i‘lâmdan beş sene mukaddem kilise-yi merkūmda mütemekkin olmak sadedinde olmağla emr-i âlîşânda mastûr olduğu üzere kilisemizde buna keşiş olmak nizâmımıza mugāyir olduğundan mâ‘adâ mesfûr hadîsü’s-sin ve ef‘âl-i zemîme erbâbından olmağla evlâd ve ıyâlimiz ve zevcât ve benâtımız üzerlerine emniyetimiz yokdur deyü ol târihde teşekkî ve kıbel-i şer‘den i‘lâm ve mûcebince ihrâc ve ref‘i için emr-i âlîşân sâdır olmuş iken mersûm Presfus Keşiş kendi hâlinde durmayıp kilise-yi merkūmda bir papas gediği mahlûldür deyü cedîd patriki iğfâl edip ol dahi emr-i âlîşân ve teşekkî olunduğu ma‘lûmu olmamağla mersûmu papas olmak üzere vaz‘ edip ba‘dehû husûs-ı merkūm hilâf-ı emr-i âlîşân olduğu ve keşiş-i mesfûrun her vechile sû’-i hâli ma‘lûmu oldukda der-akab ref‘ ve mazmûn-ı emr-i âlî üzere tenbîh-i ekîd edip lâkin mesfûr kemâl-i hubsundan ısgā etmeyip hilâf-ı emr-i âlî ve mugāyir-i nizâmımız kilise-yi merkūmda mütemekkin papas olmak sadedinde olmağla mersûmun keyd ü mazarrâtından emniyet-i bâl ve terfîh-i ıyâlimiz için ba‘de’l-yevm mersûm Presfus Keşiş kilise-yi merkūmda kat‘a papas ve mütemekkin olmamak bâbında emr-i âlîşân sudûrunu istid‘â ve istirhâm ederiz dediklerinde mesfûrûnun ber-minvâl-i muharrer takrîr ve teşekkîlerini patrik ve metrepolidler ve sâir ehl-i ırz re‘âyâ kulları dahi tasdîk ve keşiş-i merkūmun her vechile sû’-i hâlini ihbâr etmeleriyle mesfûrûnun ber-minvâl-i muharrer istid‘â ve istirhâmları ma‘lûm-ı devletleri buyruldukda emr ü femân hazret-i veliyyü’l-emrindir. Fî 2 Rebî‘ülâhir sene 1162