Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 125 Hüküm no: 58 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Esber b. Abdullah’ın, Yuvan’da olan alacağının varisi Hasan Odabaşı’ya ödenmesi Ma‘rûz İstanbul’da Mi‘mâr Sinan mahallesi sâkinlerinden iken bundan akdem vefât eden derûn-ı i‘lâmda mezkûr Esir b. Abdullah’ın verâseti kendiyi i‘tâk eden Rumeli kuzâtı eşrâfından Abdülbaki Efendi’ye ba‘de’l-inhisâr mezbûr Abdülbaki Efendi dahi vefât edip verâseti li-ebeveyn er karındaşı Hasan Odabaşı’ya münhasıra oldukdan sonra mezbûr Hasan Odabaşı meclis-i şer‘de yine i‘lâm-ı mezkûr derûnunda mastûrü’l-ism Yuvan zimmî muvâcehesinde müteveffâ-yı evvel-i mezbûr Esir’in mesfûr Yuvan zimmî zimmetinde ber-mantûk-ı i‘lâm-ı şer‘î mahkûmun-bih otuz guruş hakkı olup meblağ-ı mezbûru kable’l-ahz mezbûr Esir vefât edip meblağ-ı mezbûr bana mevrûs olmağla meblağ-ı mezbûru mesfûr Yuvan zimmîden taleb ederim deyü ba‘de’d-da‘vâ ve’l-ikrâr mûcebiyle meblağ-ı mezbûr otuz guruşu müdde‘î-i mezbûr Hasan Odabaşı’ya edâ ve teslîmle mesfûr Yuvan zimmîye tenbîh olunduğu Mahkeme-i Bâb’da tescîl ve huzûr-ı âlîlerine i‘lâm olundu. Fî 3 min-Rebî‘ülâhir sene 1162