Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 74 Hüküm no: 70 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaybolan hüccetin yenilenmesi Büyükada karyesinde mütemekkine olup şahsı zeyl-i vesîkada muharrerü’l-esâmi kimesneler ta‘rîfleriyle mu‘arrefe olan Kasandra bt. Hrisdoli Nasrâniye meclis-i şer‘-i hatîr-i lâzimü’t-tevkīrde li-ebeveyn er karındaşı işbu râfi‘ü’r-rakīm Yorgi zimmî muvâcehesinde bi-tav‘ihi [bi-tav‘ıhâ] ikrâr ve takrîr-i kelâm edüp karye-i mezbûrede vâki‘ bir tarafı Çiftçioğlu Kostandi menzili ve bir tarafı leb-i deryâ ve bir tarafı tarîk-i âm ile mahdûd fevkānî iki bâb oda ve bir sofa ve tahtında iki kepenek dükkân ve sokak kapısını müştemil mülk menzilin dört sehim i‘tibârıyla üç sehmi karındaşım merkūmun olup ve bir sehmi benim olmağla menzil-i mezkûrda olan bir sehim hissemi târîh-i kitâbdan on üç sene mukaddem işbu hâzır bi’l-meclis Manolaki v. Dimitraki tarafımdan vekîlim olup ve Kayaoğlu Kostandi v. Yorgaki ve Malabat v. Yamandi zimmîleri işhâd etmişidim merkūm Manolaki bi’l-vekâle altmış guruş semen-i makbûza tarafeynden bi’l-îcâb ve’l-kabûl bâtten bey‘ u teslîm ve temlîk eylemişiken ol dahi ber-vech-i muharrer târîh-i mezkûrda iştirâ ve tesellüm ve temellük ve kabûl edüp târîh-i mezkûrdan beri karındaşım merkūm mülkiyet üzere tasarruf eder mukaddemâ verilen hücceti zâyi‘ etmekle el-hâletü hâzihi tasarrufu tescîl ve hüccet olunmak matlûbumuzdur dedikde [14b] gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min-Şevvâli’l-mükerrem li-sene tis‘a ve seb‘în ve mi’ete ve elf. Şuhûdü’l-hâl: Es-Seyyid Ahmed Ağa, Kayıkçı Hüseyin Beşe, Kayıkçı Süleyman Beşe, Mehmed Usta, İmam Ebubekir Efendi, Ahmed Efendi. Çiftçioğlu Kostandi, Yamandaraki, Yanaki v. Panayot, Panayot v. Yani, Korota Dimitri v. Yani.