Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 75 Hüküm no: 71 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal’da görev yapan yeniçeri serdarının azledilip yerine yenisinin tayin olunduğu Şerî‘at-şi‘âr Kartal kādısı efendi -zîde fazluhum- ba‘de’s-selâm inhâ olunur ki zîr-i hükûmetinizde vâki‘ Dergâh-ı âlî yeniçerileri serdârı ref‘ olunup yerine üslûb-ı sâbık üzere kıdvetü’l-emâsil ve’l-akrân ( ) -zîde kadruhû- serdâr ve zâbit nasb ü ta‘yîn olunmağın işbu mektûb tahrîr ve irsâl olundu inşâallâhü te‘âlâ vusûlünde gerekdir ki mûmâ-ileyh serdârlığı umûrunda kıyâm eyleyüp âharı müdâhale etdirmeyesiz ve ol tarafda vâki‘ Dergâh-ı âlî yeniçerileri ve cebeci ve topçu ve top arabacısı ve kul oğulları ve gılmân-ı acemi cümlesin üzerlerine serdâr ve zâbit bilüp sözünden taşra ve re’yinden hâric vaz‘ u hareketde bulunmayup itâ‘at ve inkıyâd üzere olalar ve tavâif-i merkūmûndan bilâ-vâris-i ma‘rûf fevt olanların muhallefât ve metrûkâtların serdâr-ı merkūma kabz etdirdüp ma‘rifet-i şer‘le Sûk-ı Sultânî’de fürûht ve hâsıl olan nukūdunu mümzâ ve mahtûm müfredât defteriyle cânib-i beytülmala irsâl ve îsâl etdirdesiz ve sen ki serdâr-ı mûmâ-ileyhsin mukīm ve müsafir zuhûr eden erâzil ve eşhâsın zabt u rabtlarına sükkân-ı beldenin emn ü rahatlarına bâ‘is hıdemât-ı müstahsene-i mebrûre vücûda getirmeye mücidd ü sâ‘î olup mûcib-i mektûb ile âmil olasın. Tahrîren fî-evâhiri şehri Şevvâli’l-mükerrem li-sene tis‘a ve seb‘în ve mi’ete ve elf.