Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 126 Hüküm no: 60 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Angelina bt. Aryeri’nin sulh yoluyla kocası Pirinççi Yorgi v. Yani ile evliliklerini sonlandırıp birbirlerinin zimmetini ibra ettikleri Zevciyetden ibrâ Ma‘rûz Fi’l-asl İzmir ahâlîsinden olup mahmiye-i İstanbul’da Hammâmî Muhyiddin mahallesi sâkinelerinden zâtı Osman Ağa b. Mustafa nâm kimesne ile Dimitri v. Yani nâm zimmî ta‘rîfleriyle mu‘arrefe olan sahibe-i arzuhâl Angelina bt. Aryeri? nâm zimmiye meclis-i şer‘-i enverde İstanbul’da Zindânkapısı sûku ahâlîsinden derûn-ı arzuhâlde mezkûr Pirinçci Yorgi v. Yani zimmî muvâcehesinde târih-i i‘lâmdan bir sene mukaddem işbu merkūm Yorgi mahmiye-i mezbûrede Fenerkapısı kurbünde Tahtaminâre mahallesi mescidi önünde mahalle-i mezbûre imâmı el-Hâc Hüseyin Efendi huzûrunda yetmiş üç guruş mehir tesmiye[siyle] nefsine beni akd-i nikâh birle bana duhûl edip ve benim merkūmdan hâlâ hamlim dahi hâsıl olmuş iken merkūm Yorgi benim menzilime gelmekden münkatı‘ olup nafaka ve meûnetimi görmekden imtinâ‘ etmekle ke’l-evvel menzilime gelip nafaka ve meûnetimi görmesini taleb ve da‘vâ eylediğimde ol dahi beni nikâh ve tezevvüc ve bana duhûlünü külliyyen inkâr edip ol vechile beynimizde münâza‘ât-ı kesîre vâkı‘a olmuşidi el-hâletü hâzihî bâ-vesâtet-i muslihîn müdde‘â-yı mezkûremden mesfûr Pirinçci Yorgi zimmî ile an-inkâr yirmi guruş bedel-i makbûza sulh olup fîmâ-ba‘d da‘vâ-yı zevciyete müte‘allika âmme-i da‘vâdan merkūm Yorgi zimmînin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâ-i mezkûru ba‘de’l-kabûl bedel-i medfû‘una ve sâire müte‘allika âmme-i da‘vâdan kezâlik benim zimmetimi ibrâ ve ıskāt eyledi deyü olan ikrârını merkūm Yorgi zimmînin tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 3 min-şehri Rebî‘ülâhir sene 1162