Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 127 Hüküm no: 61 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderpaşa mahallesinden Fâtıma bt. Ahmed’in daha önce kiracısı olduğu Fâtıma bt. Ali’de olan eşyalarını teslim aldığı Teslîm-i vedî‘a Ma‘rûz Husûs-ı âti’l-beyânın mahâllinde ketb ü tahrîri için bi’l-iltimâs cânib-i şer‘den ta‘yîn olunan Kâtib el-Hâc Mustafa Efendi mahmiye-i İstanbul’da İskender Paşa mahallesinde sâkine Fâtıma bt. Ahmed nâm hatunun menziline varıp huzûr-ı Müslimînde akd-i meclis-i şer‘-i âlî eyledikde mahalle-i mezbûre sâkinelerinden zâtı el-Hâc Mustafa b. Hasan ve Hasan b. Hüseyin ta‘rîfleriyle mu‘arrefe olan diğer Fâtıma bt. Ali nâm hatun meclis-i ma‘kūd-ı mezkûrda mezbûre Fâtıma Hatun muvâcehesinde ikrâr ve takrîr-i kelâm edip mukaddemâ mezbûre Fâtıma’nın menzili derûnunda işbu meclis-i akd olunan fevkānî bir bâb odasında müste’ciri olmamla vaz‘ eylediğim yedimde olan müfredât defteri mantûkunca emti‘a-i ma‘lûmemi oda-i mezkûreden tamamen ahz u kabz eyledim fîmâ-ba‘d oda-i mezkûrede <> ve mezbûre Fâtıma Hatun yedinde ve kıbelinde bir nesne bâkī kalmadı deyü olan ikrârını mezbûre Fâtıma’nın dahi tasdîk eylediğini kâtib-i mezbûr mahâllinde ketb ü tahrîr ve ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği Mahkeme-i Bâb’dan huzûr-ı âlîlerine i‘lâm olundu. Fî-gurreti Rebî‘ülâhir sene 1162