Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 128 Hüküm no: 63 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe b. Veli’nin kendisini yaralayanlardan olduğu iddiasıyla Memiş b. Hüseyin ile Mehmed Emin b. İbrahim’e açtığı davada haksız bulunup davasının reddedildiği Mu‘ârazadan men‘ Ma‘rûz Mahmiye-i İstanbul’da Edirnekapısı dâhilinde el-Hâc Muhyiddin mahallesi sâkinlerinden Hasan Beşe b. Veli meclis-i şer‘-i enverde Mumcu Abdullah Beşe mübâşeretiyle ihzâr olunan Memiş b. Hüseyin ve es-Seyyid Mehmed Emin b. İbrahim muvâcehelerinde târih-i i‘lâmdan on bir gün mukaddem ki Cum‘a günü ba‘de salâti’l-mağrib mahalle-i mezkûrede menzilim kapısı önünde işbu mezbûr bıçak ile amden bi-gayr-ı hakkın sağ mememin yanından darb ve cerh edip işbu mezbûr es-Seyyid Mehmed Emin’in kayını gāib ani’l-meclis Hüseyin nâm kimesne dahi kezâlik bıçak ile amden bi-gayr-ı hakkın sol budum üzerinden darb ve cerh edip işbu mezbûr es-Seyyid Mehmed Emin dahi kayını gāib-i mezbûrun beni ber-vech-i muharrer cerhine sebeb olmağla mûceb-i şer‘îlerini taleb ederim deyü da‘vâsında mezbûr Memiş darb ve cerhi inkâr etmekle müdde‘î-i mezbûr müdde‘âsını beyâna havâle olunup ve mezbûr es-Seyyid Mehmed Emin’den müdde‘î-i mezbûrun takrîr-i meşrûhu üzere da‘vâsı sahîha olmamağla şer‘an mezbûr es-Seyyid Mehmed Emin’e suâl teveccüh etmeyip müdde‘î-i mezbûr Hasan mezbûr es-Seyyid Mehmed Emin’e bî-vech-i şer‘î mu‘ârazadan men‘ olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî 5 şehri Rebî‘ülâhir sene 1162