Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 129 Hüküm no: 65 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoğurtçu ve kaymakçı esnafı ile beygirle sokaklarda süt satanlar yalnızca kendilerine tahsis edilen mandıralardan süt alıp diğerlerine ait mandıralardan süt almamak üzere anlaştıkları Bâ-mühr-i hazret-i efendi. Nizâm-ı südçüyân Ma‘rûz Ashâb-ı arzuhâl yoğurtçu ve kaymakcı esnâfının kethudâları Ebûbekir ve Yoğurtçubaşı Bostânî Abdullah ve yiğitbaşıları Hasan Beşe ve ustalarından Mehmed Beşe ve Hüseyin Beşe ve Mustafa Çelebi ve Ahmed Çelebi ve Ali Beşe ve zimmîlerden Todori ve Rado ve Maçko ve Kleb ve sâirleri meclis-i şer‘de bargir ile süd gezdirip esvâkda ibâdullâha bey‘ eden tâifeden Pelo v. Neco ve Koço v. Dimo ve Panayot v. Luku ve Poto v. Gogo ve Dimo ve Kosta nâm zimmîler ve sâirleri muvâcehelerinde ez-kadîm bizim süd iştirâ eylediğimiz mandıralar başka ve işbu bargir ile süd gezdirip bey‘ edenlerin süd iştirâ eyledikleri mandıralar başka mu‘ayyen ve mümtâz olup herbirimiz âhara mu‘ayyen olanlara müdâhale etmez iken bu esnâlarda işbu mesfûrlar bizim esnâfımıza mu‘ayyen olan mandıralardan süd iştirâsına tesâddî ve nizâm-ı kadîmimize halel vermeleriyle beynimizde ba‘de vukū‘ı’l-münâza‘âti’l-kesîre el-hâletü hâzihî mesfûrlar ile bize mu‘ayyen olan Ayamama ve Ayastefanos ve Kalatarya ve Küçükçekmece ve Kaynarya [Kanarya] ve Halkalı ve …? ve Alemberdos ve Kule karyesi ve Papas karyesi ve Bosna köyü ve Küçükhalkalı ve İkitelli ve Şamlar ve Benefşe köyü ve Küçük Nakkāş ta‘bîr olunur cem‘an on altı mandıraya mesfûrlar ta‘arruz etmeyip ve mesfûrlar mu‘ayyen olan Demirkapı ve Çavuşbaşı ve Makrahora ve Nikos ve Ayapa ve Kalfa köyü ve Pendance ve Avas köyü ve Müderris karyesi ve Küçükköy ve Hacuz ve Ferhadpaşa ve Lidros ve Yahûdbergos ve Bayrampaşa ve Topçular ve Davudpaşa ve Hazînedâr ve Vidoş [Vidos] ta‘bîr olunur cem‘an on dokuz mandıraya kezâlik bizim esnâfımızdan kat‘a kimesne ta‘arruz etmeyip biz kendimize mu‘ayyen olan mandıralarda hâsıl olan südü iştirâ edip onlar dahi kendilere mu‘ayyen olan mandıralarda hâsıl südü iştirâ ve kadîmî üzere esvâkda ibâdullâha bey‘ edip ber-minvâl-i muharrer ez-kadîm herbirimize mu‘ayyen mandıraların hâsıl olan südlerini âhar iştirâ etmemek üzere kabûl ve ittifâk ve ahd ü mîsâk eyledik dediklerini mesfûrûn bargir ile esvâkda süd gezdirip bey‘ edenler dahi tasdîk edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 26 Rebî‘ülevvel sene 1162