Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 130 Hüküm no: 66 Orijinal metin no: [10a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Ali Beşe’nin ustası olup başka diyara giden İbrahim Çelebi b. Abdullah b. Abdurrahman’ın aletlerini ustasının vekil tayin ettiği Seyyid Mustafa Çelebi b. Mehmed’e teslim etmesi Ma‘rûz Hâslar kazâsına tâbi‘ Küçükçekmece kasabası ahâlîsinden derûn-ı arzuhâlde mezkûr es-Seyyid Mustafa Çelebi b. Mehmed meclis-i şer‘-i enverde mahmiye-i İstanbul’da Terkīm Câmi‘-i şerîfi civârında sâkin Berber Ali Beşe b. Abdullah muvâcehesinde mahmiye-i mezbûrede Suhte Sinan mahallesi ahâlîsinden olup mezbûr Berber Ali Beşe’nin ustası olan gāib ani’l-beled Berber İbrahim Çelebi b. Abdullah b. Abdurrahman târih-i i‘lâmdan iki sene mukaddem mârrü’z-zikr Küçükçekmece’de diyâr-ı âhara gider olduğu hâlde mahmiye-i mezbûrede Kıztaşı sûkundaki ma‘lûmü’l-hudûd berber dükkânında kalfası olan işbu mezbûr Berber Ali Beşe yedindeki berberlik âlât-ı ma‘lûmesini mezbûr Berber Ali Beşe yedinden ahz u kabz ve âhara bey‘ ve semeniyle sahib-i arzuhâl Kasber ve şerîki Bağdasar zimmîlere olan iki yüz yirmi guruş deynini edâya tarafından beni vekîl ve nâib-i menâb nasb etmekle ben dahi vekâlet-i mezkûreyi kabûl etmeğin hâlâ mezbûr Berber Ali Beşe’ye suâl olunup âlât-ı ma‘lûme-i mezkûreyi bana teslîme tenbîh taleb ederim deyü ba‘de’d-da‘vâ ve’s-suâl mezbûr Berber Ali Beşe cevâbında fi’l-vâki‘ âlât-ı ma‘lûme-i mezkûre ustası gāib-i mezbûr İbrahim Çelebi’nin mülkü olduğunu ikrâr ancak müdde‘î-i mezbûrun gāib-i mezbûr İbrahim Çelebi tarafından ber-vech-i muharrer vekâletini inkâr edicek müdde‘î-i mezbûr es-Seyyid Mustafa Çelebi müdde‘âsını ahrâr-ı ricâl-i Müslimînden ve mârrü’z-zikr Küçükçekmece kasabası ahâlîsinden Mehmed Ağa b. Mustafa ve Halil Beşe b. Ali nâm kimesneler şehâdetleriyle mezbûr Berber Ali Beşe muvâcehesinde vech-i şer‘î üzere ba‘de’l-isbât ve’t-ta‘dîl ve’l-kabûl mûcebiyle hüküm olunup zikrolunan âlât-ı ma‘lûmeyi vekîl-i müdde‘î-i mezbûra teslîm ile mezbûr Berber Ali Beşe’ye tenbîh olunduğu Mahkeme-i Bâb’dan huzûr-ı âlîlerine i‘lâm olundu fermân men-lehu’l-emrindir. Fî selhi Rebî‘ülevvel sene 1162