Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 134 Hüküm no: 73 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni Arasta haffafları esnaflarının, Hacı Süleyman b. İbrahim’in esnaf arkadaşlarına sövmeyi adet haline getirdiğinden ıslah oluncaya kadar esnaflıktan uzaklaştırılması talepleri Ma‘rûz İstanbul’da Saraçhâne kurbünde Yeni Arasta haffâflarından Feyzullah b. İbrahim Bâb Mahkemesi’nde meclis-i şer‘de Mumcu Musa Beşe mübâşeretiyle ihzâr ettirdiği yine arasta-i mezkûr haffâflarından Hacı Süleyman b. İbrahim muvâcehesinde târih-i i‘lâm günü arasta-i mezkûr derûnunda mezbûr Hacı Süleyman şütûm-ı galîza ile bana şetm etmekle mûceb-i şer‘îsini taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını Ahmed b. Abdülkerim ve es-Seyyid İsmail b. Ali şehâdetleriyle mezbûr Hacı Süleyman muvâcehesinde vech-i şer‘î üzere isbât etmekle mûcebiyle mezbûr Hacı Süleyman’ın ta‘zîrine ba‘de’t-tenbîh arasta-i mezkûrda vâki‘ haffâf tâifesinin kethudâları Osman b. Rasûl ve Yiğitbaşı İbrahim b. Ali ve tâife-i mezkûreden İsmail b. Abdullah ve Ahmed Çelebi b. Feyzullah ve Mehmed Çelebi b. Ali ve diğer Mehmed b. Ebûbekir ve es-Seyyid Hacı Mehmed b. Mahmud ve İbrahim b. Ahmed ve es-Seyyid Mehmed b. es-Seyyid Ahmed ve es-Seyyid Mehmed b. Mehmed ve Molla Mustafa b. Hacı Mehmed nâm kimesneler meclis-i şer‘-i şerîf-i enverde mezbûr Hacı Süleyman muvâcehesinde mezbûr Hacı Süleyman arasta-i mezkûrda sâkin olup lâkin mezbûr Hacı Süleyman kendi hâlinde olmayıp dâimâ herbirimize hilâf-ı inhâ ve hilâf-ı şer‘-i şerîf lisânıyla itâle ve ta‘cîzden hâlî olmayıp kendiden bir dürlü emniyetimiz yokdur deyü herbiri dahi mezbûrun sû’-i hâlini muvâcehesinde ihbâr ve salâhı zâhir olunca haffâflık san‘atından men‘iyle ta‘zîr olunmak ricâsında oldukları huzûr-ı âlîlerine i‘lâm olundu. Fî 12 min-Rebî‘ülâhir sene 1162