Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 135 Hüküm no: 75 Orijinal metin no: [11a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Kiryako v. Marat’ın kereste bedelinden Barsam v. Vatro’da olan alacağının ödenmesine yapılan tenbih Bâ-mühr-i hazret-i efendi Ma‘rûz Keresteci tâifesinden Kiryako v. Marat nâm zimmî meclis-i şer‘de sahib-i arzuhâl Barsam v. Vatro nâm zimmî ile terâfu‘larında mesfûr Barsam’ın bundan akdem bin yüz elli yedi senesinde malımdan ve yedimden iştirâ ve kabz eylediği ma‘lûmü’l-ecnâs ve’l-mikdâr kereste semeninden iki yüz doksan dokuz guruş elli akçe zimmetinde hakkım olup hatta işbu yedimde olan temessük mûcebince târih-i i‘lâmdan yirmi ay mukaddem vilâyetine gider oldukda meblağ-ı merkūm cihet-i merkūmeden zimmetinde bana deyni olduğunu mahzar-ı şühûdda ikrâr ve işhâd dahi etmekle taleb ederim deyü ba‘de’d-da‘vâ ve’s-suâl ve’l-inkâr müdde‘î-i mersûm müdde‘âsını lede’t-tezkiye adâletleri zâhir olan yine keresteci tâifesinden Yasef v. Mesail ve Arslan v. Agop nâm zimmîler şehâdetleriyle mesfûr Barsam muvâcehesinde vech-i şer‘î üzere isbât etmeğin mûcebince ba‘de’l-hükm meblağ-ı mezkûrun tamamen edâsıyla mersûm Barsam’a tenbîh olunduğu huzûr-ı âlîlerine i‘lâm olundu. Fî 12 min-şehri Rebî‘ülâhir sene 1162