Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 136 Hüküm no: 76 Orijinal metin no: [11a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Muhyiddin-i Kocavî Vakfı’na ait menzili usulsüz olarak zapt eden İsmail b. Ebubekir’in menzili vakıfın evladından hak sahibi olan Şerife Fâtıma bt. Ahmed’e teslim etmesi Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyânın mahâllinde ketb ü tahrîr için savb-ı şer‘den bi’l-iltimâs ta‘yîn olunan keşif nâibimiz müderrisîn-i kirâmdan Ruhi Mustafa Efendi dâ‘îleri mahmiye-i İstanbul’da Hoca Hayreddin mahallesinde vâki‘ merhûm Şeyh Muhyiddin-i Kocavî’nin süknâsı muhtâcîn-i evlâda meşrûta menâzil-i müteehhilînden mahâll-i nizâ‘ olan menzile varıp cerîdede mastûrü’l-esâmî Müslimîn huzûrunda akd eylediği meclis-i şer‘de evlâd-ı vâkıf-ı müşârün-ileyhden sahibe-i arzuhâl Şerife Fâtıma bt. Ahmed nâm hatun zâtı ba‘de’t-ta‘dîl ve’t-ta‘rîfi’ş-şer‘î hasmı derûn-ı arzuhâlde mezkûrü’l-ism es-Seyyid İsmail b. es-Seyyid Ebûbekir’i zâbiti nakībü’l-eşrâf çavuşu mübâşeretiyle ihzâr ve muvâcehesinde menâzil-i mezkûreye ber-mûceb-i şart-ı vâkıf evlâddan süknâya muhtâc olanlar mutasarrıf olagelip [11b] binâenaleyh menzil-i mezkûra mutasarrıfe iken bundan akdem vefât eden Emetullah Hatun yerine ben müstehıkka ve alîle ve süknâya eşedd-i ihtiyâc ile muhtâce ve mezbûr es-Seyyid İsmail muntazamü’l-hâl ve menâzil-i merkūmeden hâlâ menzil-i âhara mutasarrıf iken kanâ‘at etmeyip fuzûlî menzil-i mahlûl-i mezbûra dahi vaz‘-ı yed eder deyü da‘vâ ve ber-vech-i meşrûta vakf-ı mezbûr mütevelliyesi hâzıratü bi’l-meclis Şerife Havva Hatun tarafından hasbe’l-istihkāk menzil-i mezkûr kendiye tefvîz olunduğunu nâtık bir kıt‘a temessük ibrâz etmeğin gıbbe’s-suâl mezkûr es-Seyyid İsmail cevâbında fi’l-hakīka menâzil-i mezkûre muhtâcîn-i <> evlâda meşrûta ve müdde‘iye-i mezbûre evlâddan müstehıkka ve alîle ve süknâya muhtâce idiğin ikrâr eylediğinden mâ‘adâ ricâl-i evlâddan es-Seyyid Mehmed ve es-Seyyid Osman ve es-Seyyid Ali Çelebi ve Müezzin es-Seyyid Ahmed ve es-Seyyid Hüseyin Ağa ve es-Seyyid Sâdık ve nisvândan Şerife Fâtıma Hatun ve ahâlî-i mahalleden İmâm Mehmed Efendi ve el-Hâc Mehmed ve sâir bî-garaz sikāt-ı Müslimîn hakīkat-i hâl ber-minvâl-i muharrer olduğunu bi’l-muvâcehe alâ-tarîkı’ş-şehâde ihbâr ve mütevelliye-i mezbûre dahi tasdîk etmeğin mûcebiyle ba‘de’l-hükm menzil-i mezbûru müdde‘iye-i merkūme Şerife Fâtıma’ya teslîme mezbûr es-Seyyid İsmail’e tenbîh eylediğini mevlânâ-yı mûmâ-ileyh mahâllinde ketb ü tahrîr ve ma‘an ba‘s olunan ümenâ-i şer‘le gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu. Fî 8 min-Rebî‘ülâhir sene 1162