Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 137 Hüküm no: 78 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mustafa’nın, Hacı Abdülgani b. Mustafa’dan satın aldığı cariye Şehriban’ın hür olduğunu ispat etmesi üzerine Hacı Abdülgani’nin İbrahim’e parasını iade etmesi Ma‘rûz Sahib-i arzuhâl İbrahim b. Mustafa Mahkeme-i Bâb’da meclis-i şer‘de esirci tâifesinden Hacı Abdülgani b. Mustafa muvâcehesinde târih-i i‘lâmdan bir sene mukaddem orta boylu kara gözlü açık kaşlı Şehriban nâm câriye-i memlûkesini Gürciyyetü’l-asl olmak üzere iki yüz yirmi guruş semen-i medfû‘ ve makbûza bana bey‘ ve teslîm ben dahi ber-vech-i muharrer iştirâ ve tesellüm eylediğimden sonra târih-i i‘lâmdan dokuz gün mukaddem Mahkeme-i Bâb’da meclis-i şer‘de mevsûfe-i mezbûre Şehriban vilâyet-i İran’da medîne-i Tebriz mahallâtından Deveciler mahallesi ahâlîsinden Acemiyyü’l-asl Müslimü’n-neseb Mehmed Kulu b. Abdullah nâm sünnî ve hürrü’l-aslın firâşından hâsıla ve hürretü’l-asl olan zevce-i menkûhası sünniye Fâtıma bt. Abdurrahman nâm Müslimeden mütevellide hürretü’l-asl olduğunu medîne-i mezkûrede zikrolunan Deveciler mahallesi ahâlîsinden olup hâlâ mahmiye-i İstanbul’da merhûm ve mağfûrun-leh Sultan Bâyezid Han Câmi‘-i şerîfi kurbünde ticâret vechi üzere sâkin udûl-i ahrârdan lede’t-tezkiye şehâdetleri makbûle olan Mehmed b. Ali ve Hüseyin b. Hacı İsmail şehâdetleriyle benim muvâcehemde vech-i şer‘î üzere ba‘de’l-isbât mûcebince mevsûfe-i mezbûre Şehriban’ın hürriyetine ba‘de’l-hükm sebîli tahliye ve benim kasr-ı yedime tenbîh olunmağla hâlâ medfû‘um olan meblağ-ı mezbûr iki yüz yirmi guruşu mezbûr Hacı Abdülgani’den taleb ederim deyü ba‘de’d-da‘vâ mezbûr Hacı Abdülgani cevâbında mevsûfe-i mezbûre Şehriban’ı târih-i mezkûrda gāib ani’l-meclis Yağcı Ebûbekir Beşe ile şerîki Hacı Süleyman nâm kimesnelerden Gürciyyetü’l-asl yedlerinde câriye-i memlûkesi oldukları hâlde iki yüz on beş guruş semen-i medfû‘ ve makbûza iştirâ ve tesellüm edip yine Gürciyyetü’l-asl olmak üzere müdde‘î-i mezbûr İbrahim’e iki yüz yirmi guruş semen-i medfû‘ ve makbûza bey‘ eyledim deyü ber-vech-i muharrer bey‘ini ikrâr lâkin mevsûfe-i mezbûrenin ber-vech-i muharrer hürriyetini isbât eylediğini inkâr edicek müdde‘î-i mezbûr İbrahim ber-vech-i meşrûh müdde‘âsını es-Seyyid Mustafa b. Hasan ve es-Seyyid Ali b. Mustafa şehâdetleriyle mezbûr Hacı Abdülgani muvâcehesinde vech-i şer‘î üzere ba‘de’l-isbât mûcebince semen-i mezbûr iki yüz yirmi guruşu müdde‘î-i mezbûr İbrahim’e edâ ve teslîme mezbûr Hacı Abdülgani’ye tenbîh olunduğu huzûr-ı âlîlerine i‘lâm olundu. Fî 14 min-Rebî‘ülâhir sene 1162