Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 138 Hüküm no: 79 Orijinal metin no: [11b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Arslan’ın, İslamiyet’i kabul edip Fâtıma ismini alan cariyesini azat ettiği Bâ-mühr-i hazret-i efendi Ma‘rûz Orta boylu açık kaşlı kara gözlü Gürciyyetü’l-asl mukaddemâ Fana ismiyle müsemmât olan şeref-i İslâm ile müşerrefe olmağla Fâtıma ismiyle müsemmât olan sahibe-i arzuhâl meclis-i şer‘de rıkka olduğunu mu‘terife olmağla kendiye vâzı‘u’l-yed olan Arslan nâm Yahûdî ile terâfu‘larında ben mesfûrun yedinde câriye-i memlûkesi olduğum hâlde bundan akdem bin yüz elli dört senesi şehr-i Rebî‘ülevvel i gurresinde beni bi’t-terâzî dokuz sene-i kâmile hizmet üzerine kitâbete kesip el-ân müddet-i mezkûre tamamına on ay kalıp lâkin bi-hamdillâhi te‘âlâ ben şeref-i İslâm’la müşerrefe olduğumda hizmet ile itmâm-ı müddete imkân kalmayıp bedel-i mislini sa‘y ve îfâ ile hürriyetime hüküm ve sebîlim tahliye olunmak matlûbumdur [12a] deyü ba‘de’d-da‘vâ ve’s-suâl mesfûr Arslan Yahûdî mevsûfe-i mezkûreyi ber-minvâl-i muharrer kitâbete kesdiğini ikrâr ve bakıye on ay için bedel mutâlebesinden dahi mezbûrenin zimmetini ibrâ ile malımdan tahrîr ve i‘tâk eyledim dedikde mevsûfe-i mersûme sâir harâir-i asliyât gibi hürre olduğu ba‘de’t-tescîl huzûr-ı âlîlerine i‘lâm olundu. Fî 14 min-Rebî‘ülâhir sene 1162