Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 139 Hüküm no: 80 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Hüseyin’in, su hakkını sattığı Hüseyin Ağa b. Eyüb’de alacağı kaldığı iddiasıyla açtığı davanın daha önce görüldüğünden reddedildiği Bâ-mühr-i hazret-i efendi Ma‘rûz Sahib-i arzuhâl Ahmed Ağa b. Hüseyin dîvân-ı âlîlerinde ma‘kūd meclis-i şer‘de Hüseyin Ağa b. Eyüb ile terâfu‘larında yedimde mülküm olup Havâss-ı Aliyye kazâsında Sazlıdere ta‘bîr olunur mevzi‘de hafr-ı âbâr ve tahte’l-arz lağımlar ile Sedbaşı nâm mahâlde merhûm Sultan Bâyezid tâbe serâhu suyoluna bâ-izn-i mütevellî ilhâk olunan bir masûra üç çuvaldız mâ-i lezîzden buçuk masûra hakk-ı mecrâ ve bir çuvaldız çeşmede cârî olandan mâ‘adâ bir masûra mâ-i lezîzi lağım ve kanavâtıyla tarafeynden îcâb ve kabûlü hâvî bey‘-ı kat‘î-i şer‘î ile târih-i i‘lâmdan sekiz ay mukaddem altı yüz elli guruşa mezbûr Hüseyin Ağa’ya bey‘ edip ol dahi ber-minvâl-i meşrûh iştirâ ve temellük ettikden sonra semeni olan meblağ-ı mezkûrdan iki yüz guruşunu ahz edip bâkī mezbûr Hüseyin Ağa zimmetinde dört yüz elli guruş hakkım olmağla taleb ederim deyü ba‘de’d-da‘vâ ve’s-suâl mezbûr Hüseyin Ağa cevâbında işbu müdde‘î-i mezbûr meblağ-ı mezkûru bundan akdem târih-i i‘lâm senesi Muharrem’inin yirmi beşinci günü benden taleb ve da‘vâ eylediğinde ben dahi ber-minvâl-i muharrer bir masûra mâ-i lezîz iştirâ eylediğimi ikrâr lâkin semeni olan altı yüz elli guruşu tamamen merkūma teslîm edip hatta tamamen ahz ve istifâsını hâlâ Havâss-ı Refî‘a kādısı umdetü’l-mevâliyi’l-izâm Abdurrahman Efendi huzûrunda ikrâr dahi etmişidi deyü def‘le mukābele eylediğimde ol dahi def‘-i mezkûrumu ikrâr lâkin ikrâr-ı mezkûru kâziben etmişdim dedikde müdde‘î-i merkūm ikrâr-ı meşrûhunda kâzib olmadığına bi’t-taleb ben tahlîf olunup merkūm bana bî-vech mu‘ârazadan men‘ olunmuşidi deyü min-külli’l-vücûh takrîrine mutâbık bir kıt‘a i‘lâm-ı şer‘î ibrâz edip ve mezbûr Ahmed Ağa i‘lâm-ı mezkûrun mazmûnu[nu] mukır ve mu‘terif olmağla bir def‘a şer‘le fasl olunan da‘vânın tekrar istimâ‘ına mesâ‘-ı şer‘î olmamağla merkūm Ahmed Ağa bî-vech mu‘ârazadan men‘ olunduğu huzûr-ı âlîlerine i‘lâm olundu bâkī fermân hazret-i veliyyü’l-emrindir. Fî 15 Rebî‘ülâhir sene 1162