Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 143 Hüküm no: 86 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mehmed Efendi’nin varisleri Şerife Ayşe Hatun, Şerife Sâliha Hatun ve Lütfullah’ın kendilerine intikal eden iki dükkân ve bir odadaki hisseleri ifrazının yapıldığı Ma‘rûz Fermân-ı âlîlerine imtisâlen husûs-ı âti’l-beyânı mahâllinde keşf ve tahrîr için savb-ı şer‘den bi’l-iltimâs ta‘yîn olunan keşif nâibimiz müderrisîn-i kirâmdan Ruhi Mustafa Efendi dâ‘îleri hâssa mi‘mârlarından Yakub ve es-Seyyid Feyzullah halîfeler ile mahmiye-i İstanbul’da Âbid Çelebi mahallesinde vâki‘ iştirâken müteveffâ Derviş Mehmed Efendi veresesine müntakil bir tarafdan Merdümiye Medresesi arsası ve bir tarafdan ve havâsı hissedârlardan sahibe-i arzuhâl Şerife Âişe Hatun mülkü ve tarafeyni tarîk-ı âm ve hâs arsası mukāta‘alı vakıf ve binâsı mülk bir bâb kürkçü dükkânı ve muttasıl oda ve manav dükkânını müştemil mahâll-i nizâ‘ın üzerine varıp cerîdede mastûrü’l-esâmî Müslimîn huzûrunda akd eylediği meclis-i şer‘de mezbûre Şerife Âişe Hatun zâtı ba‘de’t-ta‘rîfi’ş-şer‘î kendi tarafından asâleten ve vâlidesi Şerife Sâliha Hatun tarafından vekîle-i müseccelesi olmağla vekâleten er karındaşı ve şerîki Lütfullah ile vâlidesi ve hâl-i sıgārında vasiyyesi Zeliha Hatun muvâcehesinde zikrolunan beynimizde müşterek olmağla müşâ‘an tasarrufa mâni‘ birbirimiz ile her bâr icâre nizâ‘ı vâki‘ olmağın şer‘le keşif olunup kābil-i kısmet olduğu hâlde herkesin hissesi ifrâz ve kendiye tahsîs olunmak matlûbumdur deyü da‘vâ ve müdde‘âsına mutâbık bir kıt‘a fetvâ-yı şerîfe ibrâz edip ve lâkin mezbûr Lütfullah ve vasiyyesi merkūme Zeliha zikrolunan dükkânlar evvelen kābil-i taksîm ve sâniyen mümkinü’l-intifâ‘ değildir deyü nizâ‘ ve kısmetinden tereddüd ve imtinâ‘ etmeğin mi‘mârân-ı mezbûrân zikrolunan dükkânları ba‘de’l-mesâha mecmû‘u tûlen ve arzen bi-hesâb-ı terbî‘î altmış altı buçuk zirâ‘ olup otuz bir zirâ‘ı işbu kürkçü dükkânına tahsîs ve bâkī yirmi iki buçuk zirâ‘ oda ile on üç zirâ‘ manav dükkânı başka ifrâz olundukda kābil-i kısmet ve hisselerden intifâ‘ mümkündür deyü haber verdikleri ecilden ber-mûceb-i fetvâ-yı şerîfe taksîm ve mukaddemâ verese-i mezbûrûn beyninde bâ-hüccet-i şer‘iye taksîm olunan menzilden herbirinin hisselerine isâbet eden sihâm-ı mu‘ayyeneye tatbîk ve kat‘ā li’n-nizâ‘ mezbûr Lütfullah cânibi tercîh olunmağın zikrolunan kürkçü dükkânı köşebaşında mevki‘i şerîf ve mu‘teber ve revâc ve rağbeti gayriden ezyed ve evfer olmağla hisse-i mu‘ayyenesi’çün temyîz ve ifrâz olunup bâkī zikrolunan oda ve manav dükkânı müşâ‘an müdde‘iye-i mezbûre Şerife [13a] ile müvekkile ve vâlidesi merkūme Şerife Sâliha Hatun hisselerine kalmağla asâleten ve vekâleten kabûl etmeğin vech-i meşrûh üzere tarafeynin hisselerine had ta‘yîn ve beynlerine alâmet-i fâsıla vaz‘ olunduğunu mevlânâ-yı mûmâ-ileyh mahâllinde ketb ü tahrîr ve ma‘an ba‘s olunan ümenâ-yı şer‘le gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu. Fî 11 Rebî‘ülâhir sene 1162