Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 144 Hüküm no: 87 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daday kazasından Hamide bt. Hüseyin’in, kendisini boşayan kocası İsa b. Sefer’de altı bin akçe mehir bedeli olduğunu ispat ettiğinden mehrinin kendisine ödenmesi Ma‘rûz Anadolu’da Daday kazâsı ahâlîsinden mahmiye-i İstanbul’da Edirnekapısı dâhilinde Çukurbostan’da sâkine zâtı İbrahim b. Ahmed ve Mustafa b. ( ) ta‘rîfleriyle mu‘arrefe Hamide bt. Hüseyin meclis-i şer‘-i enverde zevc-i sâbıkı olup mârrü’z-zikr Daday kazâsı civârında vâki‘ Zara kazâsı ahâlîsinden mahmiye-i mezbûrede Beyceğiz mahallesinde sâkin İsa b. Sefer muvâcehesinde târih-i i‘lâmdan on üç sene mukaddem sâlifü’z-zikr Zara kazâsında mezbûr İsa altı bin akçe mehr-i müeccel tesmiyesiyle zevce-i menkûha-i medhûlün-bihâsı iken beni tatlîk etmekle zimmetinde olan mehr-i müsemmâ-yı mezkûr altı bin akçe hakkımı taleb ederim deyü ba‘de’d-da‘vâ ve’s-suâl mezbûr İsa cevâbında fi’l-vâki‘ müdde‘iye-i mezbûre ancak üç bin akçe mehr-i müeccel tesmiyesiyle zevce-i menkûhası olup ziyâde mehrini inkârından mâ‘adâ müdde‘iye-i mezbûre târih-i mezkûrda zikrolunan üç bin akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine olmak üzere benimle muhâla‘a olup hukūk-ı zevciyete müte‘allika âmme-i da‘vâdan zimmetimi ibrâ etmişidi deyü olan def‘ini beyâna kādir olamayıp ve istihlâf dahi etmeyip ve müdde‘iye-i mezbûre dahi mehr-i müsemmâsı altı bin akçe olduğunu ahrâr-ı ricâl-i Müslimînden lede’t-tezkiye şehâdetleri makbûle olan İsmail b. Osman ve Hüseyin b. Mustafa şehâdetleriyle mezbûr İsa muvâcehesinde vech-i şer‘î üzere ba‘de’l-isbât ve’l-kabûl mûcebiyle meblağ-ı mezbûr altı bin akçe mehr-i müecceli müdde‘iye-i mezbûre Hamide Hatun’a edâ ve teslîmle mezbûr İsa’ya tenbîh olunduğu Mahkeme-i Bâb’dan huzûr-ı âlîlerine i‘lâm olundu. Fî 18 R sene 1162