Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 145 Hüküm no: 89 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. İbrahim’in varisleri İbrahim, Hacı Osman, Emine ve Sâliha’nın mûrisleri Hatice’nin Hacı Mustafa b. İbrahim’de olan alacağını sulh yoluyla tahsil ettikleri Ma‘rûz Bundan akdem vefât eden Hadîce bt. İbrahim b. Mahmud’un verâseti zevc-i metrûku İbrahim ile li-ebin er karındaşı el-Hâc Osman’a kız karındaşları Emine ve Sâliha nâm hatunlara ba‘de’l-inhisâr mezbûr el-Hâc Osman kendi nefsinden asıl ve kız karındaşları mezbûretân Emine ve Sâliha taraflarından vekîl-i sâbitü’l-vekâleleri olmağla vekâleten ve zevci mezbûr İbrahim asâleten meclis-i hatîrde el-Hâc Mustafa b. İbrahim mahzarında mezbûr el-Hâc Mustafa zimmetinde mûrisemiz müteveffiye-i mezbûrenin ber-mûceb-i temessük cihet-i karzdan yetmiş guruş hakkının ancak elli guruşunu hayatında kendiye teslîm edip bâkī yirmi guruşu kable’l-ahz ve’l-istifâ fevt olmağın meblağ-ı bâkī-i mezkûrdan ancak beş guruş bize edâ ve teslîm bâkī on beş guruşunu dahi bi’l-asâle ve bi’l-vekâle mezbûr el-Hâc Mustafa’dan taleb ederiz deyü tesâddî eylediğimiz da‘vâmızdan bâ-vesâtet-i muslihîn on iki guruş bedel-i makbûza sulh olup mâ‘adâsına müte‘allika da‘vâdan mezbûr el-Hâc Mustafa’nın zimmetini bi’l-asâle ve bi’l-vekâle ibrâ ve ıskāt eylediğimizde ol dahi bedel-i sulh deyü bize [med]fû‘u olan meblağ-ı mezkûra müte‘allika âmme-i da‘vâdan bizim zimmetimizi ibrâ ve ıskāt eyledi deyü olan ikrârlarını ba‘de’t-tasdîk huzûr-ı âlîlerine i‘lâm olundu. Fî 18 min-şehri Rebî‘ülâhir sene 1162