Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 146 Hüküm no: 90 Orijinal metin no: [13a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bıçakcı esnafının kethudaları, yiğitbaşıları ve ustalarının nizamlarına aykırı hareket eden esnaftan İzmidli Osman b. Mustafa’nın esnaflıktan çıkarılmasını talep ettikleri Ma‘rûz Bıçakcı esnâfının kethudâları es-Seyyid Abdi b. Ahmed ve yiğitbaşıları Salih b. Mustafa ve ustalarından es-Seyyid İbrahim Çelebi b. Ali ve Kalemtıraşcı Yenfa? el-Hâc İsmail b. İbrahim ve Hüseyin b. Abdülbaki ve Ahmed b. Mustafa nâm kimesneler meclis-i şer‘de yine esnâf-ı mezkûreden İzmidî Osman b. Mustafa muvâcehesinde mezbûr Osman esnâfımız ustalarından olup ancak yedimizde olan tuğrâ-yı garrâyı hâvî fermân-ı âlî ve mûcebiyle amel ve hilâfıyla hareket edenleri meni’çün sahh-ı ber-keşîde fermân-ı âlî ile muhallâ memhûr defter mantûklarınca nizâm-ı kadîmimiz üzere olan umûr ve husûsumuzda kethudâ ve yiğitbaşı ve ihtiyâr ustalarımıza muhâlefet edip nizâm-ı kadîmimize ihtilâl verir deyü teşekkî ve mezbûr Osman Usta’nın salâhı zâhir olunca san‘at-ı mezkûreyi işlemekden men‘ ile ta‘zîr olunması bâbında fermân-ı âlî iltimâs eyledikleri Mahkeme-i Bâb’dan huzûr-ı âlîlerine i‘lâm olundu. Fî 19 Rebî‘ülâhir sene 1162