Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 146 Hüküm no: 91 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Ahmed’in, Mehmed b. Abdurrahman’a olan borcunu ödemesine yapılan tenbih Ma‘rûz Sahib-i arzuhâl Mehmed b. Abdurrahman Bâb Mahkemesi’nde meclis-i şer‘de derûn-ı arzuhâlde mezkûrü’l-ism Ali b. Ahmed muvâcehesinde bin yüz altmış bir senesi Şevvali’l-mükerremi gurresinde mezbûr Ali’ye kendi malımdan ber-mantûk-ı temessük doksan dört buçuk guruş idâne ve teslîm ol dahi ber-vech-i muharrer istidâne ve tesellüm ve kabz eylediğinden sonra meblağ-ı mezbûrun bir buçuk guruşunu yedinden ba‘de’l-ahz doksan üç guruşu bâkī kalmağla meblağ-ı bâkī-i mezbûru mezbûr Ali’den taleb ederim deyü ba‘de’d-da‘vâ mezbûr Ali cevâbında meblağ-ı mezbûr doksan dört buçuk guruş müdde‘î-i mezbûra deyni olduğunu ikrâr lâkin meblağ-ı mezbûrun on iki guruşunu müdde‘î-i mezbûr Mehmed’e edâ ve teslîm eyledim deyü ba‘de’d-def‘ ve’l-inkâr mezbûr Ali ber-vech-i muharrer def‘ini beyâna kādir olmamağla mezbûr Mehmed bi’t-taleb tahlîf olunmağla mûcebiyle meblağ-ı mezbûr doksan üç guruşu müdde‘î-i mezbûr Mehmed’e edâ ve teslîme mezbûr Ali’ye tenbîh olunduğu huzûr-ı âlîlerine i‘lâm olundu. Fî 20 Rebî‘ülâhir sene 1162