Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 147 Hüküm no: 92 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Subaşı mahallesi ahalisinin, mescidleri imamı Seyyid Ali Efendi’nin uygunsuz ve ahlaksız hareketleri olduğundan imamlıktan alınıp yerine bir başkasının tayin edilmesi talebleri Bâ-mühr-i hazret-i efendi Ma‘rûz Zikri âtî husûsu alâ-vechi’l-hakīka mütebeyyin ve münkeşif olması’çün savb-ı şer‘-i enverden irsâl olunan Feyzullah Efendi dâ‘îleri İstanbul’da Fenerkapısı dâhilinde Abdi Subaşı Mescid-i şerîfi’ne varıp akd-i meclis-i şer‘-i hatîr ettikde mahalle-i mezbûre ahâlîsinden müderrisîn-i kirâmdan Paşazâde dâmadı Yahya Efendi ve yine müderrisîn-i kirâmdan Mustafa Ârif Efendi ve kuzâtdan İbrahim Efendi ve Halil Efendi ve Ahmed Efendi ve es-Seyyid Mustafa Ağa b. Salih ve İsmail Ağa b. Ahmed ve Hüseyin Ağa b. Abdurrahman ve Mahmud Ağa b. Mehmed ve Mustafa b. Receb ve Tersâne kâtibi Abdullah Efendi ve İbrahim Çavuş b. Abdurrahman ve Müezzin Ahmed Efendi b. Hasan ve es-Seyyid Nu‘man Efendi b. Mustafa ve el-Hâc Mehmed b. İsmail ve Süleyman Ağa b. Mustafa ve Ahmed Beşe b. Abdullah ve Ali Beşe b. Mehmed ve Ömer Beşe b. Mehmed ve Mehmed b. Ebûbekir ve Mehmed b. Ahmed ve Halil Ağa b. Mehmed ile civârında vâki‘ Camcı mahallesi imâmı Mustafa Efendi ve kuzâtdan Süleyman Efendi ve Ahmed Efendi ve Hatîb Abdurrahman Efendi ve Ahmed Ağa b. Feyzullah ve Ömer Ağa b. Abdullah ve Mehmed Bey b. Veliyüddin ve Derviş Mehmed b. Ömer ve Abdülfettah b. Abdülkadir ve Mustafa b. Mehmed ve Hasan b. Abdullah ve el-Hâc İsmail Ağa b. Mehmed ve el-Hâc Ali Ağa b. Ahmed nâm kimesneler ve kezâlik civârında vâki‘ Tahtaminâre mahallesi imâmı Hüseyin Efendi ve Müezzin Süleyman ve el-Hâc Mehmed Ağa b. Ahmed ve Süleyman Ağa b. Abdullah ve Ali Efendi b. Osman ve Mehmed Çelebi b. İbrahim ve es-Seyyid Mehmed Çelebi b. Mustafa ve Mustafa b. Mehmed ve Ömer Ağa b. Ahmed ve Rahmetullâh b. Yusuf ve sâir mahallât-ı mezkûrât ahâlîsinden mazbûtü’l-esâmî altmış neferden mütecâviz nâm kimesneler meclis-i ma‘kūd-ı mezkûrda zikrolunan Abdi Subaşı Mescid-i şerîfi’nin imâmı olup derûn-ı arzuhâlde mezkûrü’l-ism es-Seyyid Ali Efendi kendi hâlinde olmayıp mahallemizde bazı menâzillere fevâhiş iskân ve envâ‘-ı mefâsid ettirdip erâzile hevâdâr ve ittifâk ve fısklarına i‘âneti olduğundan leyl ü nehâr el-hâsıl envâ‘-ı fesâdı mürtekib ve füssâka mu‘în olmağla mezbûrdan istikrâh eyledik deyü her vechile sû’-i hâlini ve adem-i adâletini ihbâr ve civârında olan mahalle-i mezkûreler ahâlîleri dahi hakīkat-i hâl minvâl-i muharrer üzere olduğunu tahkīk ve tasdîk eylediklerini mezbûr dâ‘îleri mahâllinde ba‘de’t-tahrîr ma‘an ba‘s olunan ümenâ-i şer‘le cânib-i şer‘a alâ-vukū‘ihî inhâ edip mescid-i şerîf-i mezkûr nezâret-i hazret-i sadrazamîde âsûde olan evkāfdan olmağla imâm-ı mezbûrun imâmeti ref‘ ve yerine mütedeyyin ve âdil ve iktidâya sâlih imâm nasb u ta‘yîn buyurulmak bâbında ahâlî-i mahalle-i mezkûrenin emr-i âlîşân istid‘â ve istirhâm eyledikleri ma‘lûm-ı devletleri buyruldukda emr ü fermân hazret-i veliyyü’l-emrindir. Fî 13 min-şehri Rebî‘ülevvel sene 1162