Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 148 Hüküm no: 93 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci esnafının, İstanbul, Galata, Eyüp, Hasköy ve diğer kazalarda bulunan iki yüz sekiz dükkândan başka keresteci dükkânı açılmasına izin verilmemesi talepleri Keresteci nizâmı bâ-mühr-i hazret-i efendi Ma‘rûz Ashâb-ı arzuhâl keresteci esnâfının kethudâları Mustafa Çelebi b. el-Hâc Mehmed ve yiğitbaşıları es-Seyyid İbrahim Çelebi b. Mustafa b. Mustafa ve es-Seyyid el-Hâc İsmail b. es-Seyyid Salih ve el-Hâc Mehmed b. el-Hâc Ali ve es-Seyyid Fethullah b. Mehmed ve el-Hâc Osman b. Ahmed ve el-Hâc Ali b. Mehmed ve el-Hâc Yusuf b. Abdullah ve Mehmed Çelebi b. el-Hâc İbrahim ve Mustafa Çelebi b. İbrahim ve Hasan Çelebi b. Osman ve Ali Çelebi b. Abdullah ve diğer Ali Çelebi b. el-Hâc Hasan ve Arabzâde el-Hâc Mehmed ve zimmîlerden Sekyas v. Masar ve Filyoz v. Pila ve Karabet v. Aran ve Andreyas v. Toros ve Haçok v. Nehabet ve Agop v. Tomas ve Dinpa v. Bali ve Karabet v. Kirkor ve diğer Karabet v. Vonik ve sâir Müslim ve zimmî yüz neferden mütecâviz kimesneler meclis-i şer‘de işbu derkenârda mastûr ve sicill-i mahfûzdan zahr-ı arzuhâle sûretleri muhrec yedimizde olan müte‘addid i‘lâmlar ve tuğrâ-yı garrâ-yı sultânî ile mu‘anven emr-i âlîşân mûceblerince ez-kadîm nizâmımız İstanbul ve Galata ve Üsküdar ve Ebî Eyyûb-i Ensârî ve tevâbi‘inde keresteci dükkânları iskeleler ve müte‘ayyen mahallerde olup keresteci dükkânında kesret üzere kara keten bulunmak mâ-lezime olmağın el-iyâzü billâhi te‘âlâ ateş havfı mukarrer olmakdan nâşî mahallât aralarında ve sâir çarşılarda keresteci dükkânı ihdâs olunmak ve ecânibden kimesne keresteci olmamak memnû‘ olup lâkin mahalleri ve adedleri müte‘ayyin ve mahsûr olmamağla bazı erbâb-ı mekrûhîler bu mahâlde mukaddemâ keresteci var idi yâhûd lüzûmu olmağla âhar mahâlden bi-tarîkı’n-nakl bu mahâlde binâ olunsun diyerek birer takrîb ile müceddeden keresteci dükkânı ihdâsı arzusundan fâriğ olmamalarıyla nizâm-ı kadîmimizin pezîrâ-yı halel olmayıp taht-ı zâbıtaya rabtı için ez-kadîm Bahçekapısı’nda üç dükkân ve Odunkapısı ile Ayazmakapısı’nda yüz iki dükkân ve Cibali Kapısı’nda bir dükkân ve Fenerkapısı’nda iki dükkân ve Balatkapısı’nda on dükkân ve Ayvansaraykapısı’nda bir dükkân ve Ebî Eyyûb-i Ensârî’de üç dükkân ve Edirnekapısı’nda iki dükkân ve Topkapısı’nda iki dükkân ve Şehremîni Çarşısı’nda iki dükkân ve Davudpaşa kurbünde bir dükkân ve Mi‘mâr Çarşısı’nda bir dükkân ve Yedikule taşrasında bir dükkân ve Narlıkapı’da bir dükkân ve Samatyakapısı’nda sekiz dükkân ve Davudpaşakapısı’nda sekiz dükkân ve Yenikapı’da iki dükkân ve Kum <> [14a] ve Kumkapı’da yedi dükkân ve Çatladıkapı’da üç dükkân ve Ahırkapısı’nda bir dükkân ve Hasköy’de üç dükkân ve Galata’da on bir dükkân ve Kasımpaşa’da altı dükkân ve Tophâne’de dokuz dükkân ve Fındıklı’da dört dükkân ve Beşiktaş’da iki dükkân ve Ortaköy’de iki dükkân ve Üsküdar’da sekiz dükkân cem‘an iki yüz sekiz dükkân mevcûd olup ve dekâkîn-i mezbûre itmâm-ı mesâlih-i ibâda kâfî ve vâfî ve bir vechile ziyâdeye ihtiyâc olmamağla nizâm-ı kadîmimiz ve yedimizde olan emr-i âlîşân ve senedât-ı mer‘iyye mûceblerince mârrü’z-zikr mahallerde olan mevcûd olan iki yüz sekiz dükkândan mâ‘adâ mahallât arasında ve âhar mahâlde dükkân ihdâsı men‘ ve taht-ı zâbıta-i mezkûreye rabt ile yedimize müceddeden tuğrâ-yı garrâ ile mu‘anven emr-i âlîşân inâyet ve ihsân buyurulmak bâbında istid‘â ve istirhâm ederiz dedikleri ma‘lûm-ı devletleri buyruldukda emr ü fermân hazret-i veliyyü’l-emrindir. Fî 15 Rebî‘ülâhir sene 1162