Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 149 Hüküm no: 94 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Cafer’i üç defa boşadığı halde tekrar zevciyet muamelesi için tazyik eden Mehmed b. İsmail’in müdaheleden menedildiği Ma‘rûz İstanbul’da Beyceğiz mahallesi sâkinelerinden zâtı Hüseyin b. Ahmed ve es-Seyyid Mahmud b. es-Seyyid Bayram ta‘rîfleriyle mu‘arrefe olan Hadîce bt. Cafer meclis-i şer‘-i enverde mezbûre Hadice’nin sâbıkā zevci olup Mumcu Halil Beşe mübâşeretiyle Bâb Mahkemesi’ne ihzâr olunan Mehmed b. İsmail muvâcehesinde mukaddemâ mezbûr Mehmed beni zevce-i menkûha-i medhûlün-bihâsı olduğum hâlde taht-ı nikâhında iken beni üç def‘a tatlîk etmekle ben mezbûr Mehmed’den beynûnet-i galîza ile mübâne iken yine mezbûr Mehmed bana zevciyet mu‘âmele etmek murâd eder benden kasr-ı yedine tenbîh taleb ederim deyü ba‘de’d-da‘vâ ve’s-suâl mezbûr Mehmed cevâbında müdde‘iye-i mezbûreyi ancak iki def‘a tatlîk eylediğini ikrâr ziyâdeyi inkâr etmeğin müdde‘iye-i mezbûre ber-vech-i muharrer müdde‘âsını lede’t-tezkiye şehâdetleri makbûle olan Hüseyin b. Ahmed ve es-Seyyid Mahmud b. es-Seyyid Bayram ve diğer Hüseyin b. Hasan ve Veli Beşe b. Mehmed nâm kimesneler şehâdetleriyle mezbûr Mehmed muvâcehesinde vech-i şer‘î üzere ba‘de’l-isbât ve’l-kabûl mûcebiyle ba‘de’l-hükm mezbûr Mehmed müdde‘iye-i mezbûreye zevciyet mu‘âmelesiyle mu‘ârazadan men‘ olunduğu huzûr-ı âlîlerine i‘lâm olundu. Fî 22 Rebî‘ülâhir sene 1162