Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 150 Hüküm no: 95 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır Bey mahallesinde Ketenci Hacı Ahmed’in harap olan evini yeniden yaptırırken bir oda ilave etmesine izin verilmediği Bâ-mühr-i hazret-i efendi Ma‘rûz Fermân-ı âlîlerine imtisâlen husûs-ı âti’l-beyânı mahâllinde keşf ve tahrîr için bi’l-iltimâs ta‘yîn olunan keşif nâibimiz müderrisîn-i kirâmdan Ruhi Mustafa Efendi dâ‘îleri hâssa mi‘mârlarından İbrahim ve Abdullah halîfeler ile mahmiye-i İstanbul’da Hacıkadın Hamamı kurbünde Hızır Bey mahallesinde vâki‘ ma‘lûmü’l-hudûd ve derûnunda mezkûr Kettânî el-Hâc Ahmed tasarrufunda olan arsası mukāta‘alı vakıf ve binâsı mülk menzil üzerine varıp cerîdede mastûrü’l-esâmî Müslimîn huzûrunda akd eylediği meclis-i şer‘de ashâb-ı arzuhâl ahâlî-i mahalle ve menzil-i mezkûr etrâfında vâki‘ Na‘lband el-Hâc Mustafa Vakfı mütevellî ve müste’cirlerinden es-Seyyid Ahmed ve el-Hâc Mehmed ve el-Hâc Mustafa ve sâir hem-civârları mezbûr Kettânî el-Hâc Ahmed’den işbu mu‘âyene olunan menzil-i mezbûru harâba müşrif olmağla temelden hedm ve müceddeden binâya şürû‘ etmekle vaz‘ olunan heyet tarhından ziyâde irtifâ‘la bir oda yapmak murâd eder ancak cümlemize havâle ve vakf-ı şerîfe zararı vardır deyü da‘vâ ve men‘ini istid‘â eylediklerinde gıbbe’s-suâl mezbûr el-Hâc Ahmed fi’l-hakīka menzil-i mezkûr üzerine fevkānî bir oda binâ etmek tasmîmini i‘tirâf ve lâkin zarar husûsunda nizâ‘ ve ihtilâf etmeğin nizâ‘a ba‘de’n-nazar mi‘mârân-ı mezbûrân hâlâ işbu dokuz zirâ‘ irtifâ‘la tarh olunan menzil-i mezbûr üzerine fevkānî bir oda binâsı cihânnümâ kabîlinden olmakla memnû‘âtdandır deyü haber verdikleri ecilden mezbûr el-Hâc Ahmed ve sâlifü’z-zikr oda binâsından men‘ eylediğini mevlânâ-yı mûmâ-ileyh mahâllinde ketb ü tahrîr ve ma‘an ba‘s olunan ümenâ-i şer‘le gelip alâ-vukū‘ihî inhâ ve takrîr eylediği huzûr-ı âlîlerine i‘lâm olundu. Fî 15 Rebî‘ülâhir sene 1162